کیا آر آر آر چھا 1947 پیٹھ کشیرِ سنیما ہالن منز گوڈنیچ فلم یوان ہاونہ؟

Authors

Abrar Bhat

لیفٹننٹ گورنر جموں و کشمیر منوج سنہا سندِ دسِ کشیر سنیما ہالن ہُند افتتاح کرنہ پتہ گئی سوشل میڈیاہس پیٹھ سیٹھا پوسٹ وائرل۔ یمن پوسٹن منز چُھ دعویٰ یوان کرنہ زہِ ‘آر آر آر’ چھہ 1947 پیٹھ گوڈنیچ فلم یُس کشیر سنیما ہالن منز وچھنہ یئہِ۔

لنک ہکیو توہیِ یتیتھ، یتیتھ، یتیتھ تہ یتیتھ وچتھِ۔

سوشل میڈیا پیچ لپ ٹائمزن چُھ اکھ فوٹو شیئر کورمتُ۔ اتھ فوٹوس پیٹھ چُھ لیکتھِ زہِ “کشیر خاطرء تاریخی دوہ، آر آر آر چھِ گوڈنیچ فلم یُس 1947 پتہ کشیر سنیما ہالن منز ییہ وچھنہ۔ ناقابلِ یقین کشمیر، ناقابل یقین انڈیا”۔

مرچی پلس نامی اکِ میڈیا ادارن تہِ چُھ اکسِ رپورٹس منز راہل ہنرا، یُس حالئِ افتتاح کرنہ آمتِ کشیر سنیما حالن ہُند مآلک چُھ، سندُ حوالہ لیکوھمتُ زہِ 1947 پیٹھ چھِ آر آر آر گوڈنیچ فلم یُس کشیر سنیما ہالن منز وچھنہ ییہِ۔

Fact check/ Verification

نیوز چیکرن کور اتھ سلسلس منز تحقیقات خاطرء کینہ کیورڈ گوگلس پیٹھ سرچ۔ سرچ دوران آئی اسہِ سنیما ہالن ہندِ افتتاح حوالہ سیٹھا رپورٹ لبنہ۔ یمن رپورٹن منز چُھ آمتُ دعویٰ کرنہ زہِ کشیر منزآیہ 23 وہری پتہ سینما ہال دوبار چالو کرنہ۔

دی ہندو میڈیا ادارن چُھ اکسِ رپورٹس منز لیوکھمتُ زہِ “کشیر ہندسِ سرینگرس منز پننیِ نوعیتکُ گوڈنیوکُ ملٹی پلیکس سنیما ہال گژھِ 1 اکتوبر پیٹھ چالو۔ تہ ینہ زہہ فلمہ وکرم ویدھا تہ پونین سلیوان ہاونہ۔ تھیٹرس منز فلم وچھنکُ تجربہ ییہِ کرنہ کشیر منز 23 وہریو پتہ”۔

اتھ رپورٹس منز چُھ مزید آمتُ وننہ زہِ کشیر منز آئی 1990 تس دوران 11 سنیما ہال بند کرنہ۔

ہندوستان ٹائمز کہ اکِ رپورٹ مطابق آیہ 1990 دوران سنہما ہال کشیر منز بند کرنہ یلہ ملی ٹینسی شروع گئِ۔

رپورٹ مطابق چُھ حکومتن 1999 تس دوران کشیر منز سنہما ہال دوبارء شروع کرنچ کوشش کرمژ، مگر ریگل سنیما ہس پیٹھ دوبارء حملہ کنِ آیہ بییہ سنیما بند کرنہ۔

الجزیرہ میڈٰیا ادارء مطابق تہِ آئی 23 وہری پتہ کشیر سنیما ہال دوبارء شروع کرنہ۔

امہ علاو آئی اسہِ سیٹھا میڈٰیا رپورٹ لوبنہ یمن منز ذکر چُھ آمتُ کرنہ زہِ 23 وہریو پتہ گئی کشیر سنیما ہال دوبارء شروع کرنہ۔

رپورٹن ہندُ لنک ہکیو توہیِ یتیتھ یتیتھ تہ یتیتھ وچتھ۔

امہ علاو کور اسہِ کشیر سنیما ہال تواریخ پیٹھ تہِ ریسرچ۔ سرچ دوران لبہ اسہ فرسٹ پورٹ میڈیا ادارچ اکھ رپورٹ، یتھ منز ویسناوتھِ وننہ چُھ آمت زہِ کشیر ہُند گوڈنیوک سنیما ہال چُھ بھائی اننتھ سنگ گوری ین 1932 ہس تعمیر کورمتُ۔ امیوک ناو چُھ آمتُ ماسکو کسِ ریڈ سکویر ناوس پیٹھ تھاونہ یلہ زن امیوک اصل ناؤ کشمیر ٹاکیز اوس۔ تمہ پتھ آر اتھ ناو تھاونہ پلیڈیم۔ یہ ناو چُھ انداز کنِ مشہور تھیٹر ایس ٹی پیٹرسبرگ کسِ ناوس پیٹھ تھاونہ، یہ زن معروف تاریخ دان خال بشیر سندُ حوالہ دیتھ اوٹ لکُ کسِ اکسِ رپورٹس منز وننہ چُھ آمتُ۔

اتھ رپورٹس منز چُھ وننہ آمتُ زہِ 1980 تس منز آسِ کشیر منز تقریباً 15 سنیما ہال چالو تہ سرینگرس منزآسہِ 9 یمن منز ریگل، نیلم، ناز، خیام، تہ شیراز وغیرہ شامل چھِ۔

رپورٹس منز چُھ ویسناوتھِ وننہ آمتُ زہِ 1989 تس دوران آئی اکِ تنظیم اللہ ٹایگرس طرفہ فلمہ غآر اسلامی قرار دیتھِ سنیما ہالن آخبارو ذریعہ پابندی لگاونہ، امہ تنظیمِ ہنز قیادت اوس کران ائر مارشل نور خان۔ امہِ تنظیم ہندُ نعرہ اوس ایران انقلابکُ “لاشراکیہ ولا غرابیہ، اسلامیہ اسلامیہ”۔

اسہ آو سرچِ دوران خالد بشیر احمد سندُ اکھ ارٹیکل سکُوپ نیوز ویب سائٹِ پیٹھ لبنہ۔ یتھ منز وننہ چُھ آمتُ زہِ نیلم سنیما اوس 2010  ہس منز خراب حالاتن دوران بند آو کرنہ۔

ارٹیکل مطابق آئی 24 ستمبر 1999 تس منز ریگل سنیماہس منز سنی دیول تہ مہیما چودھری ہنز فلم ‘پیار کوئی کھیل نہیں’ ہاونہ، اتھ دوران آو سیمنا ہالس پیٹھ گرنیڈ حملہ کرنہ، تہ سنیما ہال آو بند کرنہ۔

Conclusion

لہذا یہ دعویٰ زہِ آر آر آر چھِ گوڈنیچ فلم یُس کشیر سنیما ہالن منز 1947 پتھ ییہِ ہاونہ چھُ غلط۔ سانِ تحقیق کرنہ پتہ آو اسہِ لبنہ زہِ 1990 تس تانِ آسہ کشیر منز سنیما ہال چالو۔

Result: False

If you would like us to fact-check a claim, give feedback, or lodge a complaint, WhatsApp us at 9999499044 or email us at checkthis@newschecker.in. You can also visit the Contact Us page and fill out the form.

Authors

Abrar Bhat