2026 தேர்தல் தொடர்பாக உதயநிதி-அண்ணாமலை ரகசிய சந்திப்பு; வைரலாகும் தகவல் உண்மையானதா?

Claim: 2026 தேர்தல் தொடர்பாக உதயநிதி-அண்ணாமலை ஸ்டார் ஹோட்டலில் ரகசிய சந்திப்பு

Fact: வைரலாகும் படம் ஐசரி கணேஷ் தாயார் மறைவுக்கு உதயநிதியும் அண்ணாமலையும் அவரது வீட்டிற்கு வந்தபோது எடுக்கப்பட்டதாகும்; ஸ்டார் ஹோட்டலில்  எடுக்கப்பட்டதல்ல. அதேபோல் அப்படம் அண்மை படமல்ல; 2022 ஆம் ஆண்டின் பழைய படமாகும்.

“உதயநிதி ஸ்டாலின் அண்ணாமலை ஸ்டார் ஹோட்டலில் ரகசிய சந்திப்பு! 2026க்கு பாஜக திமுக தீட்டும் தேர்தல் வியூகம் என்ன? 2026 திமுக – பாஜக கூட்டணி?” என்று குறிப்பிட்டு துணை முதலமைச்சர் உதயநிதி ஸ்டாலினும் பாஜக தலைவர் அண்ணாமலையும் ஒன்றாக இருக்கும் புகைப்படம் ஒன்று சமூக வலைத்தளங்களில் பரவி வருகின்றது.

X Link | Archive Link

Archive Link

Archive Link

சமூக ஊடகங்களில் பரவி வரும் இத்தகவலின் உண்மைத்தன்மைக் குறித்து அறிய இத்தகவல் குறித்து நியூஸ்செக்கர் தமிழ் சார்பில் ஆய்வு செய்ய முடிவு செய்தோம்.

Also Read: மசாஜ் செய்யும்போது தலையை திருப்பியதால் இளைஞர் மரணம்; வைரலாகும் வீடியோ உண்மையானதா?  

Fact Check/Verification

2026 தேர்தல் தொடர்பாக உதயநிதி-அண்ணாமலை ஸ்டார் ஹோட்டலில் ரகசிய சந்திப்பு நடத்தியதாக புகைப்படம் ஒன்று வைரலானதை தொடர்ந்து அப்படத்தை ரிவர்ஸ் சர்ச் முறைக்கு உட்படுத்தி அப்படம் குறித்து தேடினோம்.

இத்தேடலில் ”முதல்வர் எப்படி இருக்கிறார்? உதயநிதியிடம் கேட்ட அண்ணாமலை” என்று தலைப்பிட்டு ஜூலை 15, 2022 அன்று மின்னம்பலம் வெளியிட்டிருந்த செய்தியில் இதே படம் பயன்படுத்தப்பட்டிருந்ததை காண முடிந்தது.

வேல்ஸ் பல்கலைக்கழக துணைவேந்தர் ஐசரி கணேஷின் தாயார் மரணத்திற்கு சென்றிருந்தபோது இப்படம் எடுக்கப்பட்டதாக அச்செய்தியில் குறிப்பிடப்பட்டிருந்தது.

தொடர்ந்து தேடியதில் வேறு சில ஊடகங்களும் இதே செய்தியை இதே புகைப்படத்துடன் அச்சமயத்தில் வெளியிட்டிருந்ததை காண முடிந்தது. அவற்றை இங்கே, இங்கே மற்றும் இங்கே காணலாம்.

இதன்படி பார்க்கையில் துணை முதலமைச்சரும் அண்ணாமலையும் ஸ்டார் ஹோட்டலில் ரகசியமாக சந்தித்ததாக பரவும் தகவல் தவறானது என்பது உறுதியாகின்றது.

இவ்வருடம் ஏப்ரலில் நடந்த நாடாளுமன்ற தேர்தலில் கோவையில் டம்மி வேட்பாளரை நிறுத்த அண்ணாமலையும் உதயநிதியும் சந்தித்தாக கூறி இதே படம் சமூக ஊடகங்களில் பரவியது. அப்போதே அத்தகவல் தவறானது என்று நியூஸ்செக்கர் தமிழ் சார்பில் தெளிவுப்படுத்தி செய்தி வெளியிட்டிருந்தோம்.

தற்போது மீண்டும் 2026 தேர்தல் தொடர்பாக இத்தலைவர்கள் ரகசிய சந்திப்பு நடத்தியதாக மற்றொரு பொய் செய்தியுடன் இப்படம் பரப்பப்பட்டு வருகின்றது.

 Also Read: இந்து பெண்ணுக்கு புர்கா தந்து மானத்தை காப்பாற்றிய இஸ்லாமியப் பெண்; வைரலாகும் வீடியோ உண்மையானதா?

Conclusion

2026 தேர்தல் தொடர்பாக உதயநிதி-அண்ணாமலை ஸ்டார் ஹோட்டலில் ரகசிய சந்திப்பு நடத்தியதாக பரப்பப்படும் தகவல் தவறானதாகும். வைரலாகும் படம் ஐசரி கணேஷ் தாயார் மறைவுக்கு உதயநிதியும் அண்ணாமலையும் அவரது வீட்டிற்கு வந்தபோது எடுக்கப்பட்டதாகும்; ஸ்டார் ஹோட்டலில்  எடுக்கப்பட்டதல்ல. அதேபோல் அப்படம் அண்மை படமல்ல; 2022 ஆம் ஆண்டின் பழைய படமாகும்.

இந்த உண்மையை உரிய ஆதாரங்களுடன் விளக்கியுள்ளோம். ஆகவே வாசகர்கள் யாரும் இத்தகவலை நம்ப வேண்டாம் என்று நியூஸ்செக்கர் தமிழ் சார்பில் கேட்டுக் கொள்கின்றோம்.

Result: False

Our Sources
Report from Minnambalam, Dated July 15, 2022
Report from IBC Tamilnadu, Dated July 15, 2022
Report from Indian Express Tamil, Dated July 15, 2022
Report from Asianet News Tamil, Dated July 15, 2022

(உங்களுக்கு ஏதேனும் ஒரு தகவல் குறித்து சந்தேகம் ஏற்பட்டாலோ அல்லது ஏதாவது ஒரு தகவலின் உண்மைத்தன்மைக் குறித்து அறிய விரும்பினாலோ 9999499044 என்கிற வாட்ஸ்ஆப் எண்ணிற்கோ, அல்லது checkthis@newschecker.in என்ற மின்னஞ்சல் முகவரிக்கோ உங்கள் கேள்விகளை அனுப்பலாம்.

எங்கள் இணையத்தளத்தில் உள்ள  Contact Us பக்கத்திற்குச் சென்று அதில் உள்ள படிவத்தைப் பூர்த்தி செய்தும் அனுப்பலாம்)