کیا ترکی منز آوا زلزل سآتِ گاڑین درمیان یہ حادثہ پیش؟

Authors

Abrar Bhat

ترکی منز حالیِ زلزل گژھنہ پتہ گئی سوشل میڈیاہس پیٹھ اتھ سلسلس منز سیٹھا ویڈیو وائرل۔ یتھِسی اکسِ وائرل ویڈیوس یتھ منز گاڑین ہُند حادثہ چُھ پیش یوان، متعلق چُھ یوان دعویٰ کرنہ زہِ یہ حادثہ آو حالیِ آمتِ زلزل وجہ پیش۔

میڈیا ادارو تہ سوشل میڈیا صارِفو چُھ ترکی منز حالیِ زلزل کسِ سلسلس منز یہ ویڈیو شیئر تہ تِمو چُھ دعویٰ کورمتُ زہِ یہ حادثہ آؤ زلزل وجہ پیش۔

فوکس نیوز ڈاٹ کام نامی اکِ وئب سائٹِ چُھ یہوے ویڈیو شیئر کورمتُ یتھ متعلق تِمو دعویٰ چُھ کورمتُ زہِ یہ چُھ ترکی منز حالیِ زلزلہ وجہ گاڑین درمیان حادثہ پیش آمتُ۔ ویڈیو کسِ ڈسکرپشنس منز چُھ تِمو لیُوکھمتُ ‘ترکی منز 6۔1 شدت سان زلزل’۔

یتھی کنِ چُھ جموں و کشمیر پیٹھ شائع گژھن والیِ اخبار گریٹر کشمیرن تہِ ترکی منز حالیِ زلزل کسِ سلسلس اکھ رپورٹ شائع کرمژ۔ رپورٹس منز چُھ آمتُ وننہ زہِ ‘ترکی منز5۔9 شدت سان زلزل کسِ نتیجس منز گئیِ 55 نفر زخمی’۔

اتھ رپورٹس ساتیِ چُھ اخبارن وائرل ویڈیوکُ سکرین شارٹ شیئر کورمتُ۔ سکرین شارٹ کس کیپشنس منز چُھ لیکتھِ زہِ ‘بدھوارِ دوہ ترکی منز 5۔9 شدت سان زلزل کہِ وجہ گو ہائے وے یس پیٹھ معطل، حتیٰ کہ گاڑین گؤ پانونِ ٹکراو’۔

Fact Check/ Verification

نیوز چیکرن کور ترکی منز حالیِ زلزل کسِ سلسلس منز شیئر کرنہ یوان امہِ ویڈیوچ حقیقت زاننہ خاطرء یہ وائرل ویڈیو انوڈِ کہِ مدد ساتِ کیفریمن منز تقسیم، تہ یِمو منز کرِ کینہہ کیفیرم اسہِ گوگل ریورس امیج سرچ۔ تاہم گو نہ اسہِ کانہہ تہ نتیجہ برآمد۔

امہِ پتھ وچھ اسہِ یہ ویڈیو غور سان تہ اسہِ آؤ لبنہ زہِ یہ چُھ گاڑیین درمیان ٹکر گژھنہکُ معاملہ، تہ اسہِ کور یوٹیوبس پیٹھ ‘ترکی منز گاڑیین پانون ٹکر’ تہ اسہِ آئی کینہہ ویڈیو یوٹیوب چینلن پیٹھ لبنہ۔

الہاس نیوز ایجنسی ہنزِ یوٹیوب چینلِ پیٹح آئی اسہِ یہ وائرل ویڈیو لبنہ یمہِ کسِ کیپشنس منز لیکتھِ چُھ زہِ ‘اکِ ڈرایئور سندِ دسِ گاڑئِ تیز چلاونہ وجہ گئیِ 12 گاڑئِ پانونِ حادثکُ شکار، یمہِ کسِ نتیجس منز گئیِ 8 نفر زخمی، یمن اکسِ نفرء سنز حالت تشویشناک چھِ یوان وننہ۔ حادثہ وجہ گو موقس پیٹھ کہرام جمع’۔ اتم رپورٹس منز چُنہ کانہہ تہ زلزکُ ذکر آمتُ کرنہ کینہہ۔

امہِ علاؤ آئی اسہِ یہ ترکی منز حالیِ زلزل ساتِ گاڑین درمیان حادثہ ویڈیو نیوز ویو کسِ یوٹیوب چینلِ پیٹھ، اتھ منز تہِ چُھ ویڈیو کسِ کیپشنس منز لیکتھِ زہِ ڈرایئور سندِ دسِ تیز گارئِ چلاونہ وجہ ساتِ گئیِ واریاہ گاڑِ حادثکُ شکار۔ تہ کینہہ تفر گئیِ زخمی۔

ٹی4 ہائبر نامی یوٹیوب چینلِ پیٹھ تہِ چُھ یہ وائرل ویڈیو اپلوڈ کرتھِ۔ اتھ چینلِ پیٹھ تہِ چُھ ویڈیو کسِ ڈسکرپشنس منز ییِ آمتُ وننہ۔ تاہم چُھنہ حادثکُ وجہ زلزل آمتُ ونہہ۔

امہِ ساتِ گو واضع زہِ ترکی منز حالیِ زلزل چُھنہ امہ گاڑین ہندِ حادثکُ وجہ۔

توہی آسنِ ژیتس زہِ گاڑی ہندِ حادثہ تہ زلزل دوشوئ حادثہ آئے اکیِ دوہ پیش، تاہم آئی دوشوئ حادثہ الگ الگ اوقاتن منز پیش۔

Conclusion

نیوز چیکر کسِ تحقیقاتس منز گو ثابت زہِ گاڑیین ہُند حادثہ تہ ترکی منز حالیِ زلزلہ اتھ چُھنہ پانونِ کانہہ تہ تعلقُ۔ گاڑیین ہُند حادثہ آؤ ڈرایئور سندِ طرفہ تیز گاڑئ چلاونہ ساتِ پیش۔

Result: Missing Context

کسی بھی مشکوک خبر کی تحقیقات، تصحیح یا دیگر تجاویز کے لیے ہمیں واٹس ایپ کریں: 9999499044 یا ای میل: checkthis@newschecker.in

Authors

Abrar Bhat