سوشل میڈیاہس پیٹھ چُھِ نارکُ ویڈیو وائرل گژھان، دعویٰ چُھ یوان کرنہ زہِ یہ چُھ کشیرہندسِ ضلع کپوارِ کسِ ہندوارِعلاقس منز بھارتی فوجن حریت لیڈر چودھری شاہین اقبال سندُ مکان زالتھِ ژھونمتُ۔
اکِ ٹویٹر صارفن چُھ نارکُ ویڈیو شیئر کرتھِ لیکوھمتُ زہِ ‘بھارتی فوج چُھ کشیرِ منز نسل کشی سآتِ سآتِ کآشرئن معاشی طور کمزور تہ بے گھر کران’۔
یہ نارکُ ویڈیو چُھ فیس بُک تہ ٹویٹرس پیٹھ تہِ وائرل گژھان، یمن ہُند آرکایئو لنک ہیکیو توہیِ یتیتھ، یتیتھ، یتیتھ تہ یتیتھ وچتھِ۔
امہ علاو اکِ پاکستانِ میڈیا ادار مردان نیوز اکسِ رپورٹس منز لیکھان زہِ بھارتی فوجن چُھ حریت لیڈر سندُ مکان تہ دکان زالتھِ ژھونمتُ۔
رپورٹس منز چُھ وننہ آمت زہِ ‘کنوینئر حریت کانفرنس محمود احمد ساغر تہ جنرل سیکرٹری شیخ عبدالمتینن چُھ اکسِ مشترکہ بیانس منز چودھری شاہین اقبال سندسِ نقصانس پیٹح دکھ بؤمتُ”۔
امہِ رپورٹچ تفصیل ہیکیو توہیِ یتیتھ پرتھِ۔
Fact Check/ Verification
یہ زاننہ خاطرء زہِ نارکُ ویڈیو چھا واقعی کپوارِ ضلع کہِ ہندوار علاقکُ نیوز چیکرن کور مقامی صحافی پیرزادہ عبدالرشیدس سآتِ رابطہ۔ تَمو ؤن زہِ تِمو چُھ موقس پیٹھ گژتھِ یہ معاملہ رپورٹ کورمتُ۔ عبدالرشید سندِ وننہ مطابق چُھنہ یہ مکان تہ دکان حریت لیڈر سندُ کینہہ بلکہ چُھ یہ تَمہِ سندسِ برادر نظیر احمد بڑھانہ سندُ۔ صحافی سندُ ونن چُھ زہِ نظیر احمد سندِ بیان مطابق چُھنہ نار بھارتی فوجن لگؤ متُ کینہہ، بلکہ چُھ نار بجلی ہندِ شارٹ سرکٹِ وجہ لوگمتُ۔
نارکُ ویڈیو کسِ بارس منز پنُن تحقیقیات موثر بناونہ خاطرء کورِ اسِہ دکھ زدہ نظیر احمد بڑھانہ ہس ساتِ فونس پیٹھ رابطہ۔ تِمو کور اَتھ الزامَس صاف انکار زہِ یہ نار لگؤ بھارتی فوجن۔ تِمن ہُند وننُ چُھ زہِ نار لگنکُ وجہ چُھ بجلی ہُند شارٹ سرکٹِ، تہ بھارتی فوجس پیٹھ نار لگاؤنکُ الزام چُھ غلط۔
نیوز چیکرن کور تِمن نشِ دریافت کرنچِ کوششِ زہِ کیا دکان تہ مکان چھا حریت لہڈر چودھری شاہین اقبال سندُ۔ تِمو کور یہ ونتھِ صاف انکار زہِ شاہین اقبال چُھ تِمن برادر مگر تِمہ چھِ سیٹھا کال پیٹھ پاکستانس منز، تہ دکان تہ مکان چھنہ تِمن ہُند۔
Conclusion
یتھِ کنِ گو سانسِ تحقیقاتس منز ثابتِ زہِ نارکُ ویڈیو چُھ ہندوارِ علاقکُ مگر دکان تہ مکان چھنہ حریت لیڈر شاہین اقبال سندِ کینہ، تہ بھارتی فوجن چُھنہ دکان تہ مکان زآلِمتِ کینہہ۔
Result: False
Our Sources
Phonic conversation with shop owner of the House Nazir Ahmad Bhadana
Phonic conversation with Journalist Peerzada Rashid
کونہَ تہِ مشکوک خبرِ ہُند تحقیقات، تصحیح یا تجویز دینہ خاطرء کریو اسہِ ای امیل یا واٹس ایپ 9999499044۔ checkthis@newschecker.in
