انڈونیشئاہس منز 2018 ویڈیو تازء ونتھِ شیئر یوان کرنہ۔

Authors

Abrar Bhat

انڈونیشئاہس منز بنیول گژھنہ پتہ گئی سوشل میڈیاہس پیٹھ واریاہ ویڈیوز وائرل۔ یمن ویڈیون منز چُھ بنیول گژھنہ سآتِ جانی تہ مالی تقصان یوان وچھنہ۔

یمن ویڈیو ساتِ چُھ انڈونیشئاہس منز بنیول گژھنکُ اکھ ویڈیو وائرل گژھان، یمتن منز کینہہ نفر بنیولس دوران نماز پران چھِ یوان وچھنہ تہ شدید زلزلہ گژھنہ پتہ تہ چھنہ تمِ نماز تراوان کینہہ۔ اتھ ویڈیوس متعلق چُھ یوان وننہ زہِ یہ چُھ حالیِ انڈونیشئاہس منز بنیول گژھنکُ ویڈیو۔

اکِ ٹویٹر صارفن چُھ یہ ویڈیو شیئر کرتھِ لیوکھمتُ ‘انڈونیشئاہس منز 5۔6 شدتکُ بنیول۔ تہ مسجد منز آس یوان نماز پرنہ۔ یقین کامل چُھ اللہ تہ کھوژنُ کیا چُھ۔ ماشاءاللہ’۔

یمن پوسٹن ہُند لنک ہیکیو توہیِ یتیتھ تہ یتیتھ وچتھِ۔

سوشل میڈیا علاؤ چُھ یہ ویڈیو آمتُ کینہہ میڈیا ادارؤ دسِ تہِ شیئر کرنہ۔یمو میڈیا ادارو تہ چُھ اتھ ویڈیوس حالیِ انڈونیشئاہس منز بنیول گژھنکُ ؤنمت۔

اردو وائر نامی میڈیا ادارن تہ چُھ اَمہِ ویڈیوکُ رپورٹ سان اسکرین شارٹ شیئر کرتھِ یہ ویڈیو حالیِ گمتِ انڈونیشیاہس منز بنیول گژھنکُ ونمتُ۔

Fact Check/Verification

نیوز چیکرن کور انڈونیشئاہس منز بنیولکُ امہِ ویڈیوچِ حقیقات زاننہ خاطرء یہ ویڈیو کیفریمن منز تقسیم تہ یم کیفریم کرِ گوگل ریورس امیج سرچ۔ اتھ دوران آئی اسہِ انڈونیشئاہس منز بنیول بارس منز سیٹھا میڈیا رپورٹ لبنہ یمن منز یہ ویڈیو تہِ چُھ آمتُ شیئر کرنہ۔ یمن رپورٹن منز چُھ آمتُ وننہ زہِ یہ چُھ 2018 ہس منز بنیول گژھنکُ ویڈیو۔  

نیوز18 اردو وئب سائٹِ پیٹھ 9 اگست 2018 ہس منز شائع اکِس رپورٹس ساتیِ چُھ یہ ویڈیو آمتُ شیئر کرنہ۔ یتھ منز وننہ چُھ آمتُ زہِ ‘انڈونیشیا کسِ جزیرس لومبوک منز اتھوارِ دوہ گژھن والسِ زلزلس منز گئیِ 82 نفر مارء، یلکہِ زن ہت واد گئیِ زخمی۔ زلزلہ ساتِ آئس مسجد ہلان، مگر امام صابن ژٹ نہ نماز کینہہ، وچھوِ ویڈیو’۔

سرچِ دوران آئی اسہِ قومی آواز نامی اخبار چھِ وئب سائٹِ پیٹھ 8 اگست 2018 ہس منز شائع اکھ رپورٹ لبنہ، یتھ منز یہوی ویڈیو شیئر چُھ آمتُ کرنہ۔

رپورٹس منز چُھ ویڈیوس متعلق آمتُ وننہ زہِ ‘زلزلس دوران مسجدِ منز لاگتھِ کیمرہ ہس منز چُھ ویڈیو ریکارڈ گومتُ، یُس سوشل میڈیاہس پیٹھ تیزی سان وائرل گژھان چُھ۔ ویڈیوس منز چُھ صاف نظرِ یوان زہِ زلزل کہِ جھٹکو ساتِ آئس مسجد ہلان، مگر امامن ژت نہ نماز کینہہ’۔

معروف بین الاقوامی اخبار گارجن نیوز کسِ یوٹیوب چینلِ پیٹھ تہ آؤ اسہ یہوے ویڈیو لبنہ یُس اتھ پیٹھ 6 اگست 2018 ہس منز چُھ آمتُ شیئر کرنہ۔

امہِ ساتِ گو ثابتِ زہِ یہ ویڈیو چُھنہ انڈونیشئاہس منز آمتِ تازء بنیولکُ کینہہ۔ لبکہ چُھ یہ ویڈیو 4 وہری پرون۔

Conclusion

لہذا ہیکو اسہِ دعویٰ سان ونتھِ زہِ یہ ویڈیو چُھنہ حالیِ انڈونیشئاہس منز بنیولکُ کینہہ، بلکہ چُھ یہ 6 اگست 2018 ہس منز انڈونیشئاہس آمتِ بنیولکُ۔ اتھ ویڈیو چُھنہ تازء بنیولسِ سآتِ کانہہ تہ تعلق۔

Result: Partly False

کسی بھی مشکوک خبر کی تحقیقات، تصحیح یا دیگر تجاویز کے لیے ہمیں واٹس ایپ کریں: 9999499044 یا ای میل: checkthis@newschecker.in

Authors

Abrar Bhat