کیا تمل ناڈو کے کُنور میں ایمبولینس کا دروازہ کھلنے سے مریض سڑک پر گر گیا؟ پوری حقیقت یہاں جانیں

سوشل میڈیا پر ایک ویڈیو وائرل ہو رہی ہے، جس میں ایک ایمبولینس کو ہائی وے پر تیزی سے گزرتے ہوئے دکھایا گیا ہے۔ اچانک گاڑی کا دروازہ کھلتا ہے اور مریض اسٹریچر سمیت سڑک پر گر جاتا ہے۔ دعویٰ کیا جا رہا ہے کہ یہ دل دہلا دینے والا واقعہ تمل ناڈو کے کُنور میں پیش آیا ہے۔

فیس بک پر ایک صارف نے ویڈیو کے ساتھ لکھا ہے کہ “تمل ناڈو کے کُنور میں ایک افسوسناک واقعہ، ایمبولینس کا دروازہ کھلا اور مریض اسٹریچر سمیت سڑک پر آ گرا۔ ڈرائیور کو خبر تک نہ ہوئی اور وہ چلتا رہا۔ جان بچانے والی گاڑی غفلت کی علامت بن گئی”۔

Fact Check / Verification

ہم نے وائرل ویڈیو کا بغور تجزیہ کیا۔ ویڈیو پر ایک لوگو نظر آیا، جس کے نیچے ”کریولا پی آر ” لکھا ہوا تھا۔ مزید یہ کہ ایک ہائی وے سائن بورڈ بھی دکھائی دیتا ہے، جس پر انگلش میں’سولیڈا 13، ٹو آ باجا ایک کیلومیٹر’ لکھا ہے۔

اس سے شبہ ہوا کہ یہ واقعہ بھارت کا نہیں ہے۔ پھر ہم نے گوگل پر ”سولیڈا 13، ٹو آ باجا ایک کیلومیٹر” کیورڈ تلاش کیا، تلاش کے دوران معلوم ہوا کہ ‘ٹوآ باجا’ دراصل پورٹو ریکو میں واقع ایک علاقہ ہے۔

مزید تلاش پر ہمیں اے آئی کریولا پی آر نامی انسٹاگرام اور فیس بک پیجز ملے، جن پر بالکل اسی طرز کی اے آئی سے تیار کردہ کئی ویڈیوز شیئر شدہ ملیں۔ مذکورہ وائرل ویڈیو کا اصل ورژن بھی 3 نومبر کو انسٹاگرام پر اور 7 نومبر کو فیس بک پر شیئر کیا گیا تھا۔

ان پیجز کے مطالعے سے واضح ہوا کہ وائرل ویڈیو بھی مصنوعی ذہانت کے ذریعے تخلیق کی گئی ہے اور کسی حقیقی واقعے سے اس کا تعلق نہیں ہے۔

Conclusion

نیوز چیکر کی تحقیق سے یہ واضح ہوا کہ وائرل ویڈیو تمل ناڈو کے کُنور کی نہیں، بلکہ اے آئی جنریٹڈ ویڈیو ہے۔ اس ویڈیو کو فرضی معلومات کے ساتھ سوشل میڈیا پر شیئر کیا جا رہا ہے تاکہ اسے بھارت کا حقیقی واقعہ ظاہر کیا جا سکے۔

Sources
Self Analysis
Instagram post by @aicriollapr on 03 Nov 2025
Facebook post by aicriollapr on 05 Nov 2025