ایرانی کمپنی میں بنائی جا رہی بی2 بمبار طیارے کی نہیں بلکہ اے آئی سے تیار کردہ ہے یہ ویڈیو

فیس بک پر ایک صارف نے 9 سیکنڈ کی ایک ویڈیو شیئر کی ہے۔ جس میں جنگی طیارہ بناتے ہوئے لوگ نظر آرہے ہیں۔ صارف کا دعویٰ ہے کہ ایرانی کمپنی میں بی2 بمبار طیارے بنانے کی ویڈیو وائرل ہو گئی ہے۔

فیس بک صارف نے ویڈیو کے ساتھ کیپشن میں لکھا ہے “بریکنگ نیوز ایران کا ایک کلپ وائرل ہو رہا ہے جو ایران اپنے ہی کمپنی میں بی 2 بمبار بناتے ہوئے ایک کلپ وائرل ہو رہا ہے پوری دنیا میں”۔

Fact Check/Verification

ہم نے وائرل ویڈیو کا بغور خود تجزیہ کیا تو طیارے پر نظر آ رہے لوگ ایک دوسرے میں ضم ہوتے ہوئے نظر آرہے ہیں۔ اس کے علاوہ کرین میں نظر آرہا تار بھی طیارے پر کھڑے لوگوں میں ضم ہوتا ہوا دکھائی دے رہا ہے۔ تب ہمیں شبہ ہوا کہ اس ویڈیو کو مصنوعی ذہانت کی مدد سے تیار کیا گیا ہے۔

پھر ہم نے اے آئی کا پتا لگانے والے واز اٹ اے آئی اور اے آئی اور ناٹ ٹولز کی مدد لی۔ جہاں دونوں ہی ٹولز نے اس ویڈیو کو اے آئی سے تیار شدہ بتایا ہے۔

مزید تصدیق کےلئے ہم نے ڈیپ فیک اینالیسس یونٹ کو وائرل ویڈیو بھیجا۔ جس کے بعد ڈاؤ نے ویڈیو کی ہائیو اے آئی+ڈیپ فیک کلاسیفائر ٹولزکی مدد سے جانچ کی۔ اس ٹول نے ویڈیو کے اے آئی سے تیار شدہ ہونے کا 96 فیصد امکان ظاہر کیا ہے۔

مزید ہم نے وائرل کلپ کے چند فریموں کو گوگل لینس کی مدد سے تلاش کیا۔ اس دوران ہمیں کنک نامی یوٹیوب چینل پر ہوبہو ویڈیو کے علاوہ دیگر کئی ویڈیوز موصول ہوئے۔ جنہیں مصنوعی ذہانت کی مدد سے تیار کیا گیا ہے۔

مذکورہ یوٹیوب چینل کے بایو میں فراہم کردہ معلومات کے مطابق کنک چینل پر موجود تمام ویڈیوز اے آئی اینیمیشن کا استعمال کرتے ہوئے تیار کی گئیں ہیں۔ اس میں محض تفریح ​​اور بصری کہانی کو پیش کرنے کی کوشش کی گئی ہے۔ ان ویڈیوز میں کسی بھی طرح کے حقیقی واقعات نہیں دکھائے گئے ہیں ۔

Conclusion

لہٰذا نیوز چیکر کی تحقیقات میں ثابت ہوا کہ ایرانی کمپنی میں بی2 بمبار طیارے بنانے کا بتاکر شیئر کی گئی ویڈیو دراصل مصنوعی ذہانت کی مدد سے تیار کی گئی ہے۔

Sources
Self Analysis
Wasit AI tool
AI or Not tool
Analysis by DAU team
Video uploaded by YouTube channel KINK on 28 Jun 2025