کیرلہ کے سڑک حادثے کی ایک ویڈیو کو فرقہ وارانہ رنگ دےکر کیا جا رہا ہے شیئر

سوشل نٹورکنگ سائٹ فیس بک، انسٹاگرام اور ایکس پر 8 سکینڈ کی کیرلہ کے سڑک حادثے کی ایک سی سی ٹی وی فوٹیج شیئر کی جا رہی ہے۔ جس میں ایک برقعہ پوش خاتون ایک بچے کے ساتھ فٹ پاتھ پر جاتی ہوئی نظر آرہی ہے، اچانک ایک تیز رفتار کار پیچھے سے خاتون کو ٹکر مارتی ہے اور بچہ معجزانہ طور پر بچ جاتا ہے۔ صارفین کا دعویٰ ہے کہ یہ ویڈیو بھارت کی ہے، جہاں ہندو ڈرائیور نے جان بوجھ کر برقعہ پوش مسلمان خاتون کو اپنی گاڑی سے کچل دیا۔

ویڈیو کے ساتھ ایک صارف نے کیپشن میں لکھا ہے “بھارت میں ہندو انتہاپسندوں کے مسلمانوں پر حملے جاری ہیں۔ ایک مسلمان خاتون جو اپنے بچے کے ساتھ فٹ پاتھ پر چل رہی تھی، اسے ایک ہندو نے جان بوجھ کر گاڑی سے کچل دیا”۔

آرکائیو لنک یہاں، یہاں اور یہاں دیکھیں۔

Fact Check/Verification

ہم نے وائرل کلپ کے چند فریم کو گوگل لینس پر تلاش کیا۔ اس دوران ہمیں اسی ویڈیو سے متعلق ملیالم کیپشن کے ساتھ تھانتھی ٹی وی نامی یوٹیوب چینل پر 29 اپریل 2025 کواپلوڈ شدہ ویڈیو رپورٹ میں طویل ورژن موصول ہوا۔ جس میں اس ویڈیو کو کیرلہ کے ملاپورم کے کوٹکل علاقے کا بتایا گیا ہے۔ مزید پورے کلپ کو دیکھنے پر معلوم ہوا کہ ڈرائیور خود زخمی خاتون کی مدد کے لئے اس کے پاس آتا ہے اور اسے لوگوں کی مدد سے اٹھاکر گاڑی میں لے جاتا ہے۔

اس حوالے سے مزید تحقیقات کے دوران ہمیں انڈیا ٹوڈے کی ویب سائٹ پر شائع ہونے والی 2 مئی کی ایک رپورٹ ملی۔ جس کے مطابق یہ واقعہ 26 اپریل کو ملاپورم ضلع کے کوٹکل علاقے میں پیش آیا تھا۔ خاتون کی شناخت سواگتھاماڈو گاؤں کی 33 سالہ بدریہ نام کے طور پر ہوئی ہے۔

مزید تصدیق کے لئے ہماری ملیالم ٹیم نے کوٹکل اسٹیشن کے انسپکٹر ونود والیاٹور سے رابطہ کیا۔ انہوں نے بتایا کہ “یہ خبر فرضی ہے، ڈرائیور اور خاتون دونوں کا تعلق مذہب اسلام سے ہے۔ انہوں نے مزید کہا کہ ڈرائیور نے گاڑی روک کرزخمی خاتون کو اسپتال پہنچانے میں مدد کی تھی”۔

Conclusion

لہٰذا نیوزچیکر کی تحقیقات سے یہ ثابت ہوا کہ وائرل کلپ کیرلہ کی ہے اور متاثرہ خاتون اور ملزم کار ڈرائیور کا تعلق ایک ہی مذہب سے ہے۔

Sources
Video report published by YouTube channel Thanthi Tv on 29 April 2025
Report published by India Today on 2 May 2025
Telephonic conversation with Vinod Valiyattoor Inspector Kottakkal station