مسلم شخص پر تشدد کے بعد جبراً جئے شری رام کا نعرہ لگانے پر کیا گیا مجبور؟ جھوٹے فرقہ وارانہ دعوے کے ساتھ پرانی و ترمیم شدہ ویڈیو وائرل

فیس بک پر 14 سکینڈ کی ایک ویڈیو، جس میں مسلم شخص پر تشدد کرتا ہوا ایک شخص نظر آرہا ہے۔ ساتھ ہی جے شری رام کے نعرے بھی ویڈیو میں سنائی دے رہے ہیں۔ اس ویڈیو کو صارف بھارت اور پاکستان تنازعہ کے علاوہ مذہبی رنگ دے کر شیئر کر رہے ہیں۔

ویڈیو کے ساتھ صارف نے لکھا ہے “انڈیا میں مسلمانوں پر ظلم کی انتہا”۔ اس کے علاوہ ویڈیو کے ساتھ “آپریشن بنیان المرصوص، آپریشن سندور، پاکستان اسٹرائک بیک، پاک بنام انڈیا وغیرہ ہیش ٹیگ استعمال کیا گیا ہے”۔

Fact Check/Verification

ویڈیو کے ایک فریم کو گوگل لینس کی مدد سے تلاش کیا۔ اس دوران ہمیں ایک ستمبر 2024 کو شیئر شدہ ہوبہو ویڈیو روی کپور نامی ایکس ہینڈل پر موصول ہوئی۔ جس میں بھی مسلم شخص کو جبراً جئے شری رام بولنے پر مجبور کرنے کا ذکر کیا گیا ہے۔

مزید تحقیقات کے دوران ہمیں یہی ویڈیو 10 اور 12 مئی 2022 کو شیئر شدہ اکرم علی اور دُرگ بی جے پی نامی ایکس ہینڈ پر بھی ملا۔ ایکس ہینڈل درگ بی جے پی کے مطابق دہلے شاہدرہ میں واقع نتھو کالونی چوک پر ویڈیو میں نظر آرہا مسلمان شخص 14 سالہ لڑکی کے ساتھ 5 دنوں سے چھیڑخانی کر رہا تھا، موقع پر موجود اہل خانہ نے مسلم شخص کو مارا پیٹا۔ یہاں یہ واضح ہوچکا کہ ویڈیو 2 برس پرانی ہے اور اس میں جئے شری رام کے نعرے بھی سنائی نہیں دے رہے ہیں۔

پھڑ ہم نے گوگل پر “دہلی شاہدرہ میں 14 سالہ بچی کو چھیڑنے کے الزام میں مسلم شخص کی پٹائی” کیورڈ سرچ کیا۔ اس دوران ہمیں وائرل ویڈیو کے حوالے سے 12 مئی 2022 کو شیئر شدہ اے این آئی کا ٹویٹ موصول ہوا۔ جس میں دہلی پولس کے حوالے سے لکھا ہے کہ ایک 37 سالہ عرفان خان نامی شخص کو 13 سالہ لڑکی کے ساتھ مبینہ طور پر پیچھا کرنے اور بدسلوکی کرنے کے الزام میں گرفتار کیا گیا ہے۔

جس کے خلاف 354ڈی آئی پی سی اور 12 پوکسو ایکٹ کے تحت مقدمہ درج کیا گیا ہے۔ اس واقعے سے متعلق دیگر خبریں یہاں اور یہاں پڑھی جا سکتی ہیں، البتہ ان رپورٹس میں اس شخص کو “جئے شری رام‘‘” کا نعرہ لگانے پر مجبور کرنے کا کوئی ذکر نہیں ہے۔

وائرل ویڈیو میں جئے شری رام والے آڈیو کی اصلیت کا پتہ لگانے کے لئے ہم نے وائرل کلپ میں سننے والے جملوں کا استعمال کرتے ہوئے چند کیورڈ تلاش کیا۔ اس دوران ہمیں 29 اگست 2021 کی ٹائمز آف انڈیا کے یوٹیوب چینل پر اس حوالے سے شائع رپورٹ ملی۔

جس میں ایک دوسرے واقعے میں ایک مسلم کباڑی والے کو مدھیہ پردیش کے اُجّین میں جبراً جئے شری رام کا نعرہ لگانے ذکر کیا گیا ہے۔ ہم نے دونوں ویڈیو میں سنائی دے رہی آواز کا موازنہ کیا تو معلوم ہوا کہ اصل ویڈیو کے ساتھ چھیڑ خانی کی گئی ہے۔ ان رپورٹ سے اس بات کی تصدیق ہوئی کہ وائرل ویڈیو کے آڈیو میں ترمیم کی گئی ہے۔ دیگر ویڈیو رپورٹس یہاں اور یہاں دیکھی جا سکتی ہیں۔

Conclusion

اس طرح نیوز چیکر کی تحقیقات سے یہ ثابت ہوا کہ جس مسلم شخص پر تشدد کی ویڈیو کو بھارت اور پاکستان تنازعہ کے علاوہ مذہبی رنگ دے کر شیئر کیا گیا ہے وہ دراصل پرانی اورترمیم شدہ ہے۔ ویڈیو میں نظر آ رہے مسلم شخص کو نابالغ لڑکی سے چھیڑخانی کے الزام میں پیٹا گیا تھا۔

Sources
X post by @durg_BJP and @ArkamAli18 on May 2022
X post by @ANI on 12 May 2022
Video report published by Times of India on 29 Aug 2021