کیا ویراٹ کوہلی نے واقعی اسٹریلیا میں پاکستانی مداح کی پاکستانی شرٹ پر آٹوگراف دیا؟ پوری حقیقت یہاں پڑھیں

سوشل میڈیا پر ایک تصویر وائرل ہے جس میں دعویٰ کیا جا رہا ہے کہ بھارتی کرکٹر ویراٹ کوہلی اسٹریلیا میں ایک پاکستانی مداح کی پاکستانی شرٹ پر آٹوگراف دیتے ہوئے نظر آ ئے۔

فیس بک پوسٹ کے ساتھ یہ کیپشن شیئر کیا گیا، “ویراٹ کوہلی ایک بڑے دل والا پلیئر ہے جس نے کبھی کرکٹ میں سیاست نہیں کی۔ پاکستان اور بھارت کے کشیدہ حالات کے باوجود بھی ویراٹ کوہلی آسٹریلیا میں ایک پاکستانی فین کی پاکستانی شرٹ پر آٹوگراف دے رہے ہیں”۔

Fact Check/Verification

ہم نے سب سے پہلے تصویر کے ساتھ کئے گئے دعوے کی تصدیق کے لئے کیفریم کو گوگل پر چند کیورڈز کے ساتھ تلاش کیا۔ اس دوران ہمیں این ڈی ٹی وی اور کرکٹ کننٹری نامی نیوز ویب سائٹس پر رواں ماہ کی 16، 17 تاریخ کو شائع ہونے والی خبریں موصول ہوئیں۔ جس کے ساتھ فراہم کردہ تصویر اور رپورٹس کے مطابق ویراٹ کوہلی پاکستانی فین کے پاکستانی شرٹ پر نہیں بلکہ اپنی ٹیم رائل چیلنجرز بنگلور (آر سی بی) کی جرسی پر آٹوگراف دیتے ہوئے دکھائی دیتے ہیں۔

اس کے علاوہ ہمیں ریو اسپورٹز گلوبل نامی تصدیق شدہ ایکس اکاؤنٹ پر بھی آٹوگراف کی ویڈیو ملی۔ 16 اکتوبر 2025 کو شیئر کی گئی ویڈیو میں واضح طور پر ویراٹ کوہلی کو آر سی بی کی جرسی پر دستخط کرتے ہوئے دیکھا جا سکتاہے۔ ویڈیو میں دکھایا گیا سین وائرل تصویر سے مطابقت نہیں رکھتا ہے۔اس حوالے سے پاکستانی نیوز ویب سائٹ نے بھی خبریں شائع کی ہیں۔

مزید تصدیق کےلئے ہم نے اے آئی ڈیٹیکشن ٹولز کے ذریعے تصویر کی جانچ کی، جس کے لئے ہائیو ماڈریشن، سائٹ انجن،از اٹ اے آئی ٹولز کی مدد لی، اس دوران واضح ہوا کہ تصویر مصنوعی ذہانت (اے آئی) کے ذریعے تیار کی گئی ہے۔ ہائیو ماڈریشن نے اپنے تجزیہ میں اس تصویر میں 84.7 فیصد، سائٹ انجن نے 99 فیصد اور از اٹ اے آئی نے بھی 99 فیصد اے آئی یا ڈیپ فیک سے تیار کردہ مواد ہونے کے امکانات ظاہر کئے ہیں۔

Conclusion

نیوز چیکر کی تحقیقات سے یہ ثابت ہوا کہ ویراٹ کوہلی کی پاکستانی شرٹ پر آٹوگراف دیتے ہوئے شیئر کی گئی تصویر دراصل مصنوعی ذہانت کی مدد سے تیار کی گئی ہے، جبکہ اصل واقعے میں ویراٹ کوہلی نے آسٹریلیا کے پرتھ میں ایک پاکستانی مداح کو رائل چیلنجرز بنگلور(آر سی بی) کی جرسی پر آٹوگراف دیا تھا۔

Sources
Reports published by NDTV and Cricket Country on 16, 17 Oct 2025
X post by Rev Sportz Global on 16 Oct 2025
Hive moderation tool
Is It Ai tool
Sightengine tool