ಚಂದ್ರಾಪುರದಲ್ಲಿ ವ್ಯಕ್ತಿಯ ಮೇಲೆ ಹುಲಿ ದಾಳಿ, ವೈರಲ್ ಆಗಿರುವ ವಿಡಿಯೋ ಎಐನಿಂದ ಮಾಡಿದ್ದು!

Claim

ಮಹಾರಾಷ್ಟ್ರದ ಚಂದ್ರಾಪುರ ಜಿಲ್ಲೆಯ ಬ್ರಹ್ಮಪುರಿ ಅರಣ್ಯ ಅತಿಥಿ ಗೃಹದ ಸಿಸಿಟಿವಿ ದೃಶ್ಯಾವಳಿಯಲ್ಲಿ ಹುಲಿಯೊಂದು ಭದ್ರತಾ ಸಿಬ್ಬಂದಿಯ ಮೇಲೆ ದಾಳಿ ಮಾಡಿ ಎಳೆದುಕೊಂಡು ಹೋಗುತ್ತಿರುವ ವೀಡಿಯೋ ಸೆರೆಯಾಗಿದೆ ಎಂದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ.
ಈ ವಿಚಾರ ಪರಿಶೀಲಿಸುವಂತೆ ನ್ಯೂಸ್‌ ಚೆಕರ್ ವಾಟ್ಸಾಪ್‌ ಗೆ (+91-9999499044) ಮನವಿ  ಬಂದಿದ್ದು, ಅದನ್ನು ಪರಿಶೀಲನೆಗೆ ಅಂಗೀಕರಿಸಲಾಗಿತ್ತು.

Fact

ಸೂಕ್ಷ್ಮವಾಗಿ ಪರಿಶೀಲಿಸಿದಾಗ, ದೃಶ್ಯಗಳಲ್ಲಿ ವಿವಿಧ ಅಸಹಜತೆ ಕಂಡುಬಂದಿದೆ. ವಿಶೇಷವಾಗಿ ಹುಲಿ ಮತ್ತು ಕಾವಲುಗಾರ ಹಲವಾರು ಫ್ರೇಂ ಗಳಲ್ಲಿ ಅಸ್ವಾಭಾವಿಕವಾಗಿ ಬೆರೆತುಹೋದಂತೆ ಕಂಡುಬಂದಿದ್ದು, ಇದು ಡಿಜಿಟಲ್ ಕಾರ್ಯ ಕುಶಲತೆಯನ್ನು ಸೂಚಿಸುತ್ತದೆ.  

ನ್ಯೂಸ್ ಚೆಕರ್ ಕ್ಲಿಪ್ ಅನ್ನು ಹೈವ್ ಮಾಡರೇಶನ್ ಎಂಬ ಎಐ ಪತ್ತೆ ಸಾಧನದ ಮೂಲಕ ಪರಿಶೀಲಿಸಿದೆ. ಇದು ವೀಡಿಯೋ ಎಐ- ರಚಿತ ಅಥವಾ ಡೀಪ್‌ಫೇಕ್ ಆಗಿರುವ ಸಾಧ್ಯತೆಯನ್ನು 88.1% ಎಂದು ಸೂಚಿಸಿದೆ.  ಸೈಟ್‌ಎಂಜಿನ್ ಸಾಧನದ ಮೂಲಕ ಪರಿಶೀಲಿಸಿದಾಗ, ಕ್ಲಿಪ್‌ನ ಸ್ಕ್ರೀನ್‌ಶಾಟ್  ಎಐನಿಂದ- ರಚಿತವಾಗಿರುವ 90% ಸಂಭವನೀಯತೆಯನ್ನು ತೋರಿಸಿದೆ.

ಇನ್ನು, “ಚಂದ್ರಾಪುರ ಹುಲಿ ದಾಳಿ” ಎಂಬ ಕೀವರ್ಡ್ ಸರ್ಚ್ ನಡೆಸಿದಾಗ, ಆ ರೀತಿಯ ಘಟನೆಯ ಬಗ್ಗೆ ಯಾವುದೇ ಮಾಧ್ಯಮ ವರದಿ ಕಂಡುಬಂದಿಲ್ಲ.  ಬ್ರಹ್ಮಪುರಿ ಅರಣ್ಯ ವಿಭಾಗದಲ್ಲಿ ಯಾವುದೇ ಹುಲಿ ದಾಳಿ ನಡೆದಿಲ್ಲ ಎಂದು ಚಂದ್ರಾಪುರ ಅರಣ್ಯ ಇಲಾಖೆ ದೃಢಪಡಿಸಿದೆ. ವೀಡಿಯೋದ ಪ್ರಸಾರವನ್ನು ಇಲಾಖೆ ಗಂಭೀರವಾಗಿ ಪರಿಗಣಿಸಿದೆ ಮತ್ತು ಅದಕ್ಕೆ ಕಾರಣರಾದವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ (ಪ್ರೊ.) ಆರ್‌ಎಂ ರಾಮಾನುಜಂ ಹೇಳಿದ್ದಾರೆ. ಚಂದ್ರಾಪುರದ ಜಿಲ್ಲಾ ಮಾಹಿತಿ ಕಚೇರಿ ಎಕ್ಸ್‌ನಲ್ಲಿ ವೀಡಿಯೋವನ್ನು ಕೃತಕ ಬುದ್ಧಿಮತ್ತೆಯ ಸಹಾಯದಿಂದ ರಚಿಸಲಾಗಿದೆ ಎಂದು ಸ್ಪಷ್ಟಪಡಿಸಿದೆ.

ಪಿಐಬಿ ಮಹಾರಾಷ್ಟ್ರ ಕೂಡ ಈ ಹೇಳಿಕೆಯನ್ನು ತಳ್ಳಿಹಾಕಿದ್ದು, ವೈರಲ್ ದೃಶ್ಯಾವಳಿಗಳು ಕೃತಕ ಬುದ್ಧಿಮತ್ತೆಯಿಂದ ರಚಿತವಾಗಿದ್ದು, ನಿಜವಾದ ಸಿಸಿಟಿವಿ ದೃಶ್ಯ ಅಲ್ಲ ಎಂದು ಸ್ಪಷ್ಟಪಡಿಸಿದೆ.

ಆದ್ದರಿಂದ, ಚಂದ್ರಾಪುರದಲ್ಲಿ ಹುಲಿಯೊಂದು ಕಾವಲುಗಾರನ ಮೇಲೆ ದಾಳಿ ಮಾಡುವುದನ್ನು ತೋರಿಸುವ ವೈರಲ್ ವೀಡಿಯೊವು ಕೃತಕ ಬುದ್ಧಿಮತ್ತೆಯಿಂದ ರಚಿತವಾಗಿದ್ದು, ನಿಜವಾದ ಸಿಸಿಟಿವಿ ರೆಕಾರ್ಡಿಂಗ್ ಅಲ್ಲ ಎಂದು ನಾವು ಕಂಡುಕೊಂಡಿದ್ದೇವೆ.

ಶುಕ್ರವಾರ ಮೈಸೂರು ಜಿಲ್ಲೆಯಲ್ಲಿ ಹುಲಿ ದಾಳಿಯಲ್ಲಿ ರೈತನೊಬ್ಬ ಸಾವನ್ನಪ್ಪಿದ್ದಾನೆ ಎಂಬ ವರದಿಗಳ ನಡುವೆ ಈ ವಿಡಿಯೋ ವೈರಲ್ ಆಗಿದ್ದು , ಕಳೆದ ಒಂದು ತಿಂಗಳಲ್ಲಿ ಈ ಪ್ರದೇಶದಲ್ಲಿ (ಬಂಡೀಪುರ-ನಾಗರಹೊಳೆ ಅರಣ್ಯ ಪ್ರದೇಶದಲ್ಲಿ) ಮೂರನೇ ಸಾವು ಇದಾಗಿದೆ . ಈ ಪ್ರಕರಣದ ಬಳಿಕ ಅರಣ್ಯ ಇಲಾಖೆ ಹುಲಿಯೊಂದನ್ನು ಸೆರೆಹಿಡಿದಿದೆ.
ಜನವರಿ-ಜೂನ್ 2025 ರಲ್ಲಿ ವಿವಿಧ ಹುಲಿ ಮೀಸಲು ಪ್ರದೇಶಗಳು ಅಥವಾ ರಾಷ್ಟ್ರೀಯ ಉದ್ಯಾನವನಗಳ ಬಳಿ ಕನಿಷ್ಠ 43 ಜನರು ಸಾವನ್ನಪ್ಪಿದ್ದಾರೆ ಎಂದು ವರದಿಯಾಗಿದೆ , ಇದು ಜನವರಿ-ಜೂನ್ 2024 ರಲ್ಲಿ 44 ಜನರು ಹುಲಿ ದಾಳಿಯಿಂದ ಸಾವನ್ನಪ್ಪಿದ್ದಕ್ಕೆ ಸಮನಾಗಿರುತ್ತದೆ. 2022 ಮತ್ತು 2023 ರಲ್ಲಿ ಕ್ರಮವಾಗಿ ಒಟ್ಟು 110 ಮತ್ತು 82 ಜನರು ಹುಲಿ ದಾಳಿಯಲ್ಲಿ ಸಾವನ್ನಪ್ಪಿದ್ದಾರೆ (ಡೇಟಾಫುಲ್‌ನಲ್ಲಿ ಸಂಪೂರ್ಣ ಡೇಟಾಸೆಟ್ ಇಲ್ಲಿದೆ ). 

Our Sources

Hive Moderation Website

SightEngine Website

X Post By District Information Office, Chandrapur, Dated: November7, 2025

X Post By PIB Maharashtra, Dated November 7, 2025

Dataful By Factly

(ಈ ವರದಿಯನ್ನು ಮೊದಲು ನ್ಯೂಸ್‌ಚೆಕರ್ ಇಂಗ್ಲಿಷ್‌ ನಲ್ಲಿ ಪ್ರಕಟಿಸಲಾಗಿದ್ದು, ಅದು ಇಲ್ಲಿದೆ)