Claim: വയനാട്ടില്‍ കടുവ ആക്രമണത്തില്‍ കൊല്ലപ്പെട്ട രാധയുടെ വീട്ടിൽ പ്രിയങ്ക ഗാന്ധി ചിരിച്ചു കൊണ്ടിരിക്കുന്നത് കാണിക്കുന്ന ഏഷ്യാനെറ്റ് ന്യൂസിന്റെ ന്യൂസ്‌കാർഡ്.

Fact: ന്യൂസ്‌കാർഡ് എഡിറ്റാണ്.

വയനാട്ടില്‍ കടുവ ആക്രമണത്തില്‍ കൊല്ലപ്പെട്ട രാധയുടെ വീട്ടിലെത്തിയ പ്രിയങ്ക ഗാന്ധി ചിരിച്ചു കൊണ്ടിരിക്കുന്നത് കാണിക്കുന്ന ഏഷ്യാനെറ്റ് ന്യൂസിന്റെ ന്യൂസ്‌കാർഡ് സമൂഹ മാധ്യമങ്ങളിൽ വൈറലാവുന്നുണ്ട്. കടുവ കൊന്ന രാധയുടെ വീട്ടില്‍ പ്രിയങ്ക ഗാന്ധി എന്നാണ് ന്യൂസ്‌കാർഡിന് എഴുതിയിരിക്കുന്നത്. പ്രിയങ്ക ഗാന്ധിയും മകള്‍ മിരായ വാദ്രയും ഒരുമിച്ച് നിൽക്കുന്ന ചിത്രമാണ് കാർഡിൽ.

ഇവിടെ വായിക്കുക:Fact Check: കോഴിക്കോട് കാണപ്പെട്ട മഞ്ഞ് വീഴ്ച ഡിജിറ്റൽ നിർമ്മിതമാണ്

Fact Check/ Verification

2025 ജനുവരി 28നാണ് പ്രിയങ്ക വയനാട്ടില്‍ കടുവ ആക്രമണത്തില്‍ കൊല്ലപ്പെട്ട രാധയുടെ വീട് സന്ദര്‍ശിക്കാനെത്തിയത് എന്ന് വാർത്തകളിൽ നിന്നും വ്യക്തം. ആ ദിവസത്തെ വാർത്തകളിൽ ഒപ്പം മകൾ ഉണ്ടായിരുന്നതായി സൂചനയില്ല. തുടർന്ന് ഞങ്ങൾ ആ ദിവസം ഏഷ്യാനെറ്റ് ന്യൂസ് പുറത്തുവിട്ട ന്യൂസ്‌കാർഡുകൾ സാമുഹ്യ മാധ്യമങ്ങളിൽ പരിശോധിച്ചു. അപ്പോൾ യഥാർത്ഥ കാർഡ് കിട്ടി.

കടുവ കൊന്ന രാധയുടെ വീട്ടില്‍ പ്രിയങ്ക ഗാന്ധി എന്ന് തന്നെയാണ് കാർഡിൽ. എന്നാൽ ഒപ്പമുള്ള പടം വൈറൽ ചിത്രമല്ല. അതിൽ മകൾ മിരായ ഇല്ല. കോൺഗ്രസ്സ് നേതാക്കളും മറ്റു ചിലരും ഇരിക്കുന്നത് ചിത്രം കാണിക്കുന്നു. പോരെങ്കിൽ പ്രിയങ്ക വൈറൽ ചിത്രത്തിലുള്ള വസ്ത്രമല്ല ധരിച്ചിരിക്കുന്നത്. വൈറൽ ചിത്രത്തിൽ പ്രിയങ്ക നീല ചുരിദാർ ധരിച്ചാണ് നിൽക്കുന്നത് എങ്കിൽ ശരിയായ ന്യൂസ്‌കാർഡിലെ ചിത്രത്തിൽ പിങ്ക് നിറമാണ് പ്രിയങ്കയുടെ ചുരിദാറിന്.

പ്രിയങ്ക വയനാട്ടില്‍ കടുവ ആക്രമണത്തില്‍ കൊല്ലപ്പെട്ട രാധയുടെ വീട് സന്ദര്‍ശിക്കാനെത്തിയ വാർത്തയുടെ മനോരമ ന്യൂസ് പങ്കുവെച്ച വീഡിയോ ഗുഗിളിൽ തെരഞ്ഞപ്പോൾ ലഭിച്ചു. അതിലും പ്രിയങ്ക ഗാന്ധി ധരിച്ചിരിക്കുന്നത് പിങ്ക് നിറമുള്ള ചുരിദാറാണ്.

തുടര്‍ന്ന് എപ്പോൾ പ്രചരിക്കുന്ന ചിത്രം ഗൂഗിൾ ഇമേജ് സെര്‍ച്ചിന്റെ സഹായത്തോടെ റിവേഴ്‌സ് ഇമേജ് സേർച്ച് ചെയ്തു. അപ്പോൾ ദി ഹിന്ദു ദിനപത്രത്തിന്റെ എക്സ് ഹാന്‍ഡിലില്‍ 2024 മെയ് 25ന് ഈ ചിത്രം കണ്ടെത്തി. ലോക്സഭ തെരഞ്ഞെടുപ്പിന്റെ ആറാം ഘട്ടത്തില്‍ ന്യൂഡല്‍ഹിയില്‍ വോട്ട് രേഖപ്പെടുത്തിയ പ്രിയങ്ക പോളിങ് ബൂത്തിന് പുറത്ത് മകള്‍ക്കൊപ്പം നില്‍ക്കുന്ന പടമാണ് അതെന്ന് ചിത്രത്തിലെ വിവരണത്തിൽ നിന്നും മനസ്സിലായി.

Conclusion

വയനാട്ടില്ൽ കടുവ ആക്രമണത്തില്‍ കൊല്ലപ്പെട്ട രാധയുടെ വീട്ടിൽ പ്രിയങ്ക ഗാന്ധി ചിരിച്ചു കൊണ്ടിരിക്കുന്നുവെന്ന് അവകാശവാദത്തോടെ അവരുടെ പഴയ ഒരു ഫോട്ടോ എഡിറ്റ് ചെയ്തു ചേർത്ത് ഏഷ്യാനെറ്റ് ന്യൂസിന്റെ ന്യൂസ്‌കാർഡ് പ്രചരിപ്പിക്കുകയാണെന്ന് ഞങ്ങളുടെ അന്വേഷണത്തിൽ തെളിഞ്ഞു.

Result: Altered Media

Sources
Facebook Post by Asianet News on January 28,2025
YouTube Video of Manorama News on January 28,2025
X Post by The Hindu on May 25,2025

ഞങ്ങൾ ഒരു അവകാശവാദത്തെ കുറിച്ച് വസ്തുത പരിശോധന നടത്തണമെന്നോ ,അതിനെ കുറിച്ചുള്ള ഫീഡ്‌ബാക്ക് നൽകണമെന്നോ, അതിനെ കുറിച്ചൊരു പരാതി ഞങ്ങൾക്ക് നൽകണമെന്നോ നിങ്ങൾ ആഗ്രഹിക്കുന്നുവെങ്കിൽ, 9999499044 എന്ന നമ്പറിൽ വാട്ട്‌സ്ആപ്പ് ചെയ്യുക. അല്ലെങ്കിൽ checkthis@newschecker.in ൽ ഇമെയിൽ ചെയ്യുക. നിങ്ങൾക്ക് ഞങ്ങളുടെ കോൺടാക്ട് അസ് പേജ് സന്ദർശിച്ചു പരാതി ഫോം പൂരിപ്പിക്കാനും അവസരം ഉണ്ട്. ന്യൂസ്‌ചെക്കറിന്റെ ചാനൽ ഇപ്പോൾ വാട്ട്‌സ്ആപ്പിൽ തത്സമയം ലഭ്യമാണ്.