ഈ വൈറൽ ചിത്രം കുസാറ്റിൽ നടത്തിയ ‘താലിബാൻ ശൈലിയിലുള്ള’ സെമിനാറിന്റെതാണോ?

“മതേതര ഭരണഘടനയുള്ള ഭാരതത്തിലെ സിപിഎം കോട്ടയായ കേരളത്തിലെ എസ്എഫ്ഐ കോട്ടയായ കുസാറ്റിൽ നിന്നുള്ള മഹനീയമായ ഒരു രംഗം” എന്ന പേരിൽ ഒരു പോസ്റ്റ് സമൂഹ മാധ്യമങ്ങളിൽ വൈറലാവുന്നുണ്ട്. “താലിബാൻ ശൈലിയിലുള്ള” ലിംഗ വേർതിരിവ് പ്രകടിപ്പിക്കുന്ന തരത്തിൽ നടന്ന സെമിനാറിന്റെ ചിത്രം എന്ന പേരിൽ ഒരു ഫോട്ടോയോടൊപ്പമാണ് പോസ്റ്റ് വൈറലാകുന്നത്.

ഇവിടെ വായിക്കുക:ബിആർഎം ഷഫീർ മദ്യം കഴിക്കുന്ന  ചിത്രം വ്യാജം

Evidence

1.വിസ്ഡം സ്റ്റുഡന്റ്സ് ഓർഗനൈസേഷന്റെ വിശദീകരണം

മലയാളത്തിൽ കീവേഡ് സേർച്ച് നടത്തിയപ്പോൾ, വിസ്ഡം സ്റ്റുഡന്റ്സ് ഓർഗനൈസേഷന്റെ സെപ്റ്റംബർ 21, 2025 ലെ ഒരു ഫേസ്ബുക്ക് പോസ്റ്റ് ഞങ്ങൾക്ക് ലഭിച്ചു.അതിൽ വിസ്ഡം ഇസ്ലാമിക് സ്റ്റുഡന്റ്സ് ഓർഗനൈസേഷൻ ഇങ്ങനെ പറഞ്ഞു:

“വിസ്ഡം ഇസ്‌ലാമിക് സ്റ്റുഡന്റ്സ് ഓർഗനൈസേഷൻ സംസ്ഥാന സമിതി ഒക്ടോബർ 10,11,12 തീയതികളിൽ മംഗലാപുരത്ത് വച്ച് നടത്തുന്ന 29-ാമത് “പ്രോഫ്കോൺ” പ്രൊഫഷണൽ സ്റ്റുഡന്റ്സ് ഗ്ലോബൽ കോൺഫറൻസിന്റെ ഭാഗമായി വിവിധ ക്യാമ്പസുകൾക്ക് സമീപം വ്യത്യസ്ത പ്രചാരണ പരിപാടികൾ സംഘടിപ്പിച്ചു വരികയാണ്. വർഷംതോറും പതിനായിരക്കണക്കിന് വിദ്യാർത്ഥികൾക്ക് മത- ധാർമിക- അക്കാദമിക- സാമൂഹിക രംഗങ്ങളിൽ ദിശാ ബോധം നൽകി മൂന്ന് പതിറ്റാണ്ടായി കേരളക്കരക്ക് സുപരിചിതമാണ് പ്രോഫ്കോൺ.

ഇതിനകം നിരവധി ക്യാമ്പസുകൾക്ക് സമീപം 29-ാമത് പ്രോഫ്കോണിന്റെ ഭാഗമായി പ്രചാരണ പരിപാടികൾ സമാപിച്ചു കഴിഞ്ഞു. അതിൽ കുസാറ്റ് ക്യാമ്പസിലെ വിദ്യാർത്ഥികളെ പങ്കെടുപ്പിച്ച്, സമീപത്തുള്ള നഗരസഭാ കമ്മ്യൂണിറ്റി ഹാളിൽ സെപ്തംബർ 15 ന് നടന്ന പ്രീ-പ്രോഫ്കോൺ ക്യാമ്പസ് ഡിബേറ്റിനെ വിവാദമാക്കാൻ ചിലർ ശ്രമിക്കുന്നത് കണ്ടു.

കുസാറ്റ് ക്യാമ്പസിനകത്ത് പ്രോഗ്രാം നടത്തി എന്ന ശുദ്ധ നുണയാണ് ഒന്ന്. അത് വാസ്തവ വിരുദ്ധമാണെന്ന് പറയേണ്ടതില്ലല്ലോകുസാറ്റ് അധികൃതർ തന്നെ ഔദ്യോഗികമായി അത് വ്യക്തമാക്കുകയും ചെയ്തു.

ക്യാമ്പസിന്റെ പേര് ദുരുപയോഗം ചെയ്തു എന്ന നിലക്കും ചിലർ പ്രചരിപ്പിക്കുന്നത് കണ്ടു. ഓരോ വിദ്യാർത്ഥി പ്രസ്ഥാനങ്ങൾക്കും ക്യാമ്പസുകളിൽ യൂണിറ്റ് ഉണ്ടാവുകയും, ആ ക്യാമ്പസിനോട് ചേർത്തു പറയുകയും ചെയ്യുക എന്നത് പതിവല്ലേ. മുസ്‌ലിം വിദ്യാർത്ഥി സംഘടനകൾക്ക് മാത്രം അത് പാടില്ലെന്നോ?”

2.കുസാറ്റിൽ നിന്നുള്ള ഔദ്യോഗിക പ്രസ്താവന

ഇംഗ്ലീഷിൽ കീവേഡ് സേർച്ച് നടത്തിയപ്പോൾ,2025 സെപ്റ്റംബർ 19 ന് കുസാറ്റ് പുറപ്പെടുവിച്ച ഒരു വിശദീകരണം ഞങ്ങൾ കണ്ടെത്തി. അതിൽ ഇങ്ങനെ എഴുതിയിരുന്നു:

“പ്രൊഫ്കോൺ എന്ന പേരിൽ സെപ്റ്റംബർ 15,2025-ന് കുസാറ്റ് വിദ്യാർത്ഥികൾക്കായി വിസ്ഡം കോൺഫറൻസിന്റെ – ഭാഗമായ പരിപാടി സംഘടിപ്പിച്ചെന്നു് തെറ്റായ വീഡിയോ പ്രചരിക്കുന്നു. കുസാറ്റ് അത്തരം ഒരു പരിപാടി ക്യാമ്പസിന് അകത്തോ പുറത്തോ സംഘടിപ്പിച്ചിട്ടില്ല, അത്തരം പരിപാടികളെ പിന്തുണച്ചിട്ടുമില്ല. ക്യാമ്പസിൽ ഈ പരിപാടി നടന്നിട്ടില്ല. കുസാറ്റ് സമത്വവും ഉൾക്കൊള്ളലും പ്രോത്സാഹിപ്പിക്കുന്നു. തെറ്റായ വിവരങ്ങൾ പ്രചരിപ്പിച്ചവർക്കെതിരെ നിയമനടപടി സ്വീകരിക്കും”

3. ഉദ്യോഗസ്ഥരിൽ നിന്നും വിദ്യാർത്ഥികളിൽ നിന്നുമുള്ള സ്ഥിരീകരണം

“[പരിപാടിയെക്കുറിച്ച്] കുസാറ്റിന് ഒരു അറിയിപ്പും നൽകിയിരുന്നില്ല. പരിപാടിയുമായി ബന്ധപ്പെട്ട് ,പോസ്റ്റർ പ്രചാരണമോ അനുബന്ധ പ്രവർത്തനങ്ങളോ ക്യാമ്പസിൽ നടന്നിട്ടില്ല” എന്ന് കുസാറ്റ് പബ്ലിക് റിലേഷൻസ് ഓഫീസർ (പിആർഒ) വന്ദന മോഹൻദാസ് ന്യൂസ്‌ചെക്കറിനോട് പറഞ്ഞു.

എസ്‌എഫ്‌ഐ കുസാറ്റ് യൂണിറ്റ് സെക്രട്ടറി പിയൂഷ് ഇ.കെയുമായും ഞങ്ങൾ സംസാരിച്ചു. “എസ്‌എഫ്‌ഐക്കോ സിപിഎമ്മുമായി ബന്ധപ്പെട്ട ഏതെങ്കിലും സംഘടനയ്‌ക്കോ ഈ പരിപാടിയുടെ നടത്തിപ്പിൽ ഒരു പങ്കുമില്ല. പോരെങ്കിൽ, പരിപാടി ക്യാമ്പസിന് പുറത്താണ് നടന്നത്. വിസ്ഡം സ്റ്റുഡന്റ്സ് ഓർഗനൈസേഷനാണ് ഇത് സംഘടിപ്പിച്ചത്” എന്ന് അദ്ദേഹം പറഞ്ഞു.

പരിപാടിയെക്കുറിച്ച് കൂടുതൽ വ്യക്തതയ്ക്കായി വിസ്ഡം ഇസ്ലാമിക് സ്റ്റുഡന്റ്സ് ഓർഗനൈസേഷനുമായും അതിന്റെ കുസാറ്റ് ക്യാമ്പസ് യൂണിറ്റിൽ നിന്നുള്ളവരുമായും ഞങ്ങൾ ബന്ധപ്പെട്ടിട്ടുണ്ട്. പ്രതികരണം ലഭിച്ചുകഴിഞ്ഞാൽ ഞങ്ങൾ ഈ ലേഖനം അപ്‌ഡേറ്റ് ചെയ്യും.

4. മാധ്യമ റിപ്പോർട്ട്

അതേസമയം, പ്രൊഫ്‌കോൺ പരിപാടിയുമായി ബന്ധപ്പെട്ട് തങ്ങളുടെ പേര് അനധികൃതമായി ഉപയോഗിച്ചതിനെതിരെ കോടതിയെ സമീപിക്കാൻ കുസാറ്റ് തീരുമാനിച്ചതായി രജിസ്ട്രാർ അരുൺ എ.യു. പറഞ്ഞതായി ടൈംസ് ഓഫ് ഇന്ത്യ റിപ്പോർട്ട് (സെപ്റ്റംബർ 22, 2025) റിപ്പോർട്ട് ചെയ്തു.

Verdict

സിപിഎം അധ്യാപക യൂണിയന്റെയും എസ്എഫ്ഐയുടെയും നിയന്ത്രണത്തിൽ കുസാറ്റിനുള്ളിൽ താലിബാൻ ശൈലിയിൽ ലിംഗ വേർതിരിവ് പ്രകടിപ്പിക്കുന്ന രീതിയിലുള്ള സെമിനാർ സംഘടിപ്പിച്ചുവെന്ന വാദം തെറ്റാണ്. കുസാറ്റിന്റെ അനുമതിയോ പങ്കാളിത്തമോ ഇല്ലാതെ വിസ്ഡം ഇസ്ലാമിക് സ്റ്റുഡന്റ്സ് ഓർഗനൈസേഷൻ കാമ്പസിന് പുറത്ത് നടത്തിയതാണ് ഈ പരിപാടി.

ഇവിടെ വായിക്കുക: Fact Check:ചിത്രത്തിലുള്ളത് സുരേഷ് ഗോപി അപേക്ഷ നിരസിച്ച തൃശൂരിലെ കൊച്ചുവേലായുധന്റെ വീടല്ല

FAQs
Q1. സെമിനാർ കുസാറ്റിൽ നടന്നതാണോ?
അല്ല. ക്യാമ്പസിന് സമീപമുള്ള മുനിസിപ്പൽ കമ്മ്യൂണിറ്റി ഹാളിലാണ് നടന്നത്.
Q2. കുസാറ്റ് പരിപാടിക്ക് അനുമതി നൽകിയോ?
ഇല്ല. കുസാറ്റിന് ഈ പരിപാടിയുമായി ബന്ധമില്ലെന്നും,അവരുടെ പേര് അനധികൃതമായി ഉപയോഗിച്ചതിന് നിയമനടപടി സ്വീകരിക്കുമെന്നും വ്യക്തമാക്കിയിട്ടുണ്ട്.
Q3. പരിപാടി ആരാണ് സംഘടിപ്പിച്ചത്?
പ്രോഫ്കോണിന്റെ ഭാഗമായി വിസ്ഡം സ്റ്റുഡന്റ്സ് ഓർഗനൈസേഷൻ സംഘടിപ്പിച്ച പരിപാടി.
Q4. എസ്എഫ്ഐ അല്ലെങ്കിൽ സിപിഎം പരിപാടിയിൽ പങ്കെടുത്തോ?
ഇല്ല. എസ്എഫ്ഐ കുസാറ്റ് യൂണിറ്റ് സിപിഎമ്മുമായി ബന്ധമുള്ള ആരും പരിപാടിയുടെ സംഘാടനത്തിൽ ഉണ്ടായിരുന്നില്ലെന്ന് സ്ഥിരീകരിച്ചു.
Q5. പുരുഷ–സ്ത്രീ വിദ്യാർത്ഥികളെ തിരിച്ചതെന്തുകൊണ്ടാണ്?
സ്റ്റുഡന്റ്സ് ഓർഗനൈസേഷന്റെ വിശദീകരണം പറയുന്നത്, ലിംഗവ്യത്യാസം അവരുടെ പരിപാടികളിൽ പതിവായി പിന്തുടരുന്ന ശൈലിയാണെന്നാണ്.

Sources
Wisdom Students clarification – Facebook, Sept 21, 2025
CUSAT official clarification – Facebook, Sept 19, 2025
Conversation with CUSAT PRO Vandana Mohandas
Conversation with SFI CUSAT unit secretary Piyush E.K