ਮਹਾਰਾਸ਼ਟਰ ‘ਚ ਜੰਗਲਾਤ ਗੈਸਟ ਹਾਊਸ ਦੇ ਬਾਹਰ ਬੈਠੇ ਵਿਅਕਤੀ ਤੇ ਬਾਘ ਨੇ ਕੀਤਾ ਹਮਲਾ?

ਸੋਸ਼ਲ ਮੀਡੀਆ ‘ਤੇ ਇੱਕ ਬਾਘ ਵੱਲੋਂ ਇੱਕ ਵਿਅਕਤੀ ‘ਤੇ ਹਮਲਾ ਕਰਨ ਦਾ ਵੀਡੀਓ ਵਾਇਰਲ ਹੋ ਰਿਹਾ ਹੈ। ਵੀਡੀਓ ਨੂੰ ਸ਼ੇਅਰ ਕਰ ਯੂਜ਼ਰ ਦਾਅਵਾ ਕਰ ਰਹੇ ਹਨ ਕਿ ਬਾਘ ਨੇ ਮਹਾਰਾਸ਼ਟਰ ਦੇ ਬ੍ਰਹਮਪੁਰੀ ਦੇ ਚੰਦਰਪੁਰ ‘ਚ ਇੱਕ ਜੰਗਲਾਤ ਗੈਸਟ ਹਾਊਸ ਦੇ ਬਾਹਰ ਬੈਠੇ ਵਿਅਕਤੀ ‘ਤੇ ਹਮਲਾ ਕੀਤਾ।  

ਵੀਡੀਓ ਵਿੱਚ ਇੱਕ ਬਜ਼ੁਰਗ ਵਿਅਕਤੀ ਨੂੰ ਦਰੱਖਤ ਅਤੇ ਪੌਦਿਆਂ ਨਾਲ ਘਿਰੇ ਘਰ ਦੇ ਬਾਹਰ ਕੁਰਸੀ ‘ਤੇ ਬੈਠਾ ਦੇਖਿਆ ਜਾ ਸਕਦਾ ਹੈ ਜਦੋਂ ਇੱਕ ਬਾਘ ਅਚਾਨਕ ਉਸ ‘ਤੇ ਹਮਲਾ ਕਰ ਦਿੰਦਾ ਹੈ ਤੇ ਉਸਨੂੰ ਆਪਣੇ ਜਬਾੜਿਆਂ ਵਿੱਚ ਫੜ ਕੇ ਲੈ ਜਾਂਦਾ ਹੈ। ਇਸ ਵੀਡੀਓ ਨੂੰ ਸੱਚੀ ਘਟਨਾ ਦੱਸਕੇ ਸ਼ੇਅਰ ਕੀਤਾ ਜਾ ਰਿਹਾ ਹੈ ਅਤੇ ਲੋਕਾਂ ਨੂੰ ਜੰਗਲੀ ਜਾਨਵਰਾਂ ਤੋਂ ਸਾਵਧਾਨ ਰਹਿਣ ਦੀ ਅਪੀਲ ਕੀਤੀ ਜਾ ਰਹੀ ਹੈ। 

X ਅਤੇ Facebook ‘ਤੇ ਸਾਂਝੀਆਂ ਕੀਤੀਆਂ ਗਈਆਂ ਪੋਸਟਾਂ ਇੱਥੇ ਅਤੇ ਇੱਥੇ ਵੇਖੀਆਂ ਜਾ ਸਕਦੀਆਂ ਹਨ ।

Fact

ਵਾਇਰਲ ਵੀਡੀਓ ਦੀ ਜਾਂਚ ਕਰਨ ਲਈ ਅਸੀਂ ਗੂਗਲ ‘ਤੇ “ਮਹਾਰਾਸ਼ਟਰ ਦੇ ਚੰਦਰਪੁਰ ਵਿੱਚ ਬਾਘ ਨੇ ਆਦਮੀ ‘ਤੇ ਹਮਲਾ ਕੀਤ ” ਕੀਵਰਡ ਖੋਜੇ। ਸਾਨੂੰ ਦੈਨਿਕ ਭਾਸਕਰ ਦੀ ਇੱਕ ਰਿਪੋਰਟ ਮਿਲੀ, ਜਿਸ ‘ਚ ਹਾਲ ਹੀ ਵਿੱਚ ਦੱਸਿਆ ਗਿਆ ਸੀ ਕਿ ਚੰਦਰਪੁਰ ਜ਼ਿਲ੍ਹੇ ਦੀ ਚਿਮੂਰ ਤਹਿਸੀਲ ਵਿੱਚ ਇੱਕ ਕਿਸਾਨ ਅਤੇ ਤਿੰਨ ਬਲਦ ਬਾਘ ਦੇ ਹਮਲੇ ਵਿੱਚ ਮਾਰੇ ਗਏ ਸਨ। ਹਾਲਾਂਕਿ, ਵਾਇਰਲ ਵੀਡੀਓ ਇਸ ਰਿਪੋਰਟ ਵਿੱਚ ਮੌਜੂਦ ਨਹੀਂ ਹੈ। ਸਾਡੀ ਜਾਂਚ ਦੌਰਾਨ, ਸਾਨੂੰ ਕੋਈ ਭਰੋਸੇਯੋਗ ਮੀਡੀਆ ਰਿਪੋਰਟ ਨਹੀਂ ਮਿਲੀ ਜਿਸ ਵਿੱਚ ਵਾਇਰਲ ਵੀਡੀਓ ਵਾਲੀ ਘਟਨਾ ਦਾ ਜ਼ਿਕਰ ਕੀਤਾ ਗਿਆ ਹੋਵੇ।

ਨਿਊਜ਼ਚੈਕਰ ਨੇ ਹਾਲ ਹੀ ਵਿੱਚ ਕਈ ਵੀਡੀਓਜ਼ ਦੀ ਜਾਂਚ ਕੀਤੀ ਹੈ ਜੋ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਵਰਤੋਂ ਕਰਕੇ ਬਣਾਏ ਗਏ ਸਨ। ਇਸ ਵੀਡੀਓ ਨੂੰ ਲੈ ਕੇ ਵੀ ਸਾਨੂੰ ਸ਼ੱਕ ਹੋਇਆ ਕਿ ਇਹ ਐਡੀਟਡ ਜਾਂ AI-ਜਨਰੇਟਡ ਹੈ। ਧਿਆਨ ਨਾਲ ਜਾਂਚ ਕਰਨ ‘ਤੇ ਸਾਨੂੰ ਕੁਝ ਖਾਮੀਆਂ ਦਿਖੀਆਂ ਜਿਵੇਂ ਕਿ ਸੀਸੀਟੀਵੀ ਕੈਮਰੇ ਨੇ ਆਡੀਓ ਰਿਕਾਰਡ ਕੀਤਾ। ਹਮਲੇ ਤੋਂ ਪਹਿਲਾਂ ਵਿਅਕਤੀ ਬਾਘ ਤੋਂ ਬਚਣ ਲਈ ਆਸੇ – ਪਾਸੇ ਜਾਂ ਪਿੱਛੇ ਭੱਜਣ ਦੀ ਬਜਾਏ ਉਸਦੇ ਦੇ ਸਾਮ੍ਹਣੇ ਭੱਜਿਆ। ਇਸ ਤੋਂ ਇਲਾਵਾ, ਜਦੋਂ ਸ਼ੇਰ ਨੇ ਹਮਲਾ ਕੀਤਾ ਅਤੇ ਫਿਰ ਵਿਅਕਤੀ ਨੂੰ ਚੁੱਕਿਆ, ਤਾਂ ਵਿਅਕਤੀ ਦਾ ਸ਼ਰੀਰ ਹਵਾ ਵਿੱਚ ਉੱਡਦਾ ਦਿਖਾਈ ਦੇ ਰਿਹਾ ਹੈ।

Also read: ਕੀ Bhagwant Mann ਨੇ ਨਵਜੋਤ ਸਿੰਘ ਸਿੱਧੂ ਦਾ ਆਮ ਆਦਮੀ ਪਾਰਟੀ ਵਿੱਚ ਕੀਤਾ ਸਵਾਗਤ?

ਇਸ ਲਈ ਅਸੀਂ ਇਸ ਵੀਡੀਓ ਨੂੰ AI ਡਿਟੈਕਸ਼ਨ ਟੂਲਸ Hive Moderation ਅਤੇ Sightengine ‘ਤੇ ਸਰਚ ਕੀਤਾ। Hive Moderation ਦੇ ਮੁਤਾਬਕ, ਇਸ ਵੀਡੀਓ ਦੇ AI-ਜਨਰੇਟਡ ਹੋਣ ਦੀ 97.6 ਪ੍ਰਤੀਸ਼ਤ ਸੰਭਾਵਨਾ ਹੈ। Sightengine ਨੇ ਇਸ ਵੀਡੀਓ ‘ਚ ਇੱਕ ਕੀਫ੍ਰੇਮ ਨੂੰ 90 ਪ੍ਰਤੀਸ਼ਤ AI-ਜਨਰੇਟਡ ਦੱਸਿਆ।

ਵਾਇਰਲ ਦਾਅਵੇ ਦੀ ਜਾਂਚ ਕਰਦੇ ਹੋਏ ਸਾਨੂੰ PIB ਮਹਾਰਾਸ਼ਟਰ ਦੀ ਐਕਸ ਪੋਸਟ ਮਿਲੀ ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਵੀਡੀਓ ਅਸਲ ਸੀਸੀਟੀਵੀ ਰਿਕਾਰਡਿੰਗ ਨਹੀਂ ਹੈ ਸਗੋਂ AI-ਜਨਰੇਟਡ ਹੈ। ਮਹਾਰਾਸ਼ਟਰ ਦੇ ਬ੍ਰਹਮਪੁਰੀ, ਚੰਦਰਪੁਰ ਵਿੱਚ ਅਜਿਹੀ ਕੋਈ ਘਟਨਾ ਨਹੀਂ ਵਾਪਰੀ ਹੈ।

ਇਸ ਤੋਂ ਇਲਾਵਾ, IFS ਅਧਿਕਾਰੀ ਪਰਵੀਨ ਕਾਸਵਾਨ ਨੇ ਵੀ ਪੁਸ਼ਟੀ ਕੀਤੀ ਕਿ ਵੀਡੀਓ AI-ਜਨਰੇਟਡ ਹੈ। ਉਨ੍ਹਾਂ ਨੇ ਚੰਦਰਪੁਰ ਸਰਕਲ ਦੇ ਮੁੱਖ ਜੰਗਲਾਤ ਸੰਭਾਲਕਰਤਾ ਆਰ.ਐਮ. ਰਾਮਾਨੁਜਮ ਦਾ ਇੱਕ ਪ੍ਰੈਸ ਨੋਟ ਸਾਂਝਾ ਕੀਤਾ ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਚੰਦਰਪੁਰ ਖੇਤਰ ਦੇ ਬ੍ਰਹਮਪੁਰੀ ਜੰਗਲਾਤ ਵਿਭਾਗ ਵਿੱਚ ਅਜਿਹੀ ਕੋਈ ਘਟਨਾ ਨਹੀਂ ਵਾਪਰੀ ਹੈ।

Conclusion

ਸਾਡੀ ਜਾਂਚ ਤੋਂ ਸਪਸ਼ਟ ਹੁੰਦਾ ਹੈ ਕਿ ਵਾਇਰਲ ਵੀਡੀਓ ਅਸਲੀ ਨਹੀਂ ਹੈ ਸਗੋਂ ਇਸ ਨੂੰ AI ਦੀ ਵਰਤੋਂ ਕਰਕੇ ਤਿਆਰ ਕੀਤਾ ਗਿਆ ਹੈ। 

Sources
Hive Moderation Website
Sightengine Website
WasItAI Website
TikTok Account @br_ai_ded