ಬಿಹಾರ ಚುನಾವಣೆ: ಬಿಜೆಪಿ ವಿರುದ್ಧ ಹೋದರೆ ದೆಹಲಿ ಸ್ಫೋಟದಂತಹ ಪರಿಣಾಮದ ಎಚ್ಚರಿಕೆ ಯೋಗಿ ಆದಿತ್ಯನಾಥ್ ನೀಡಿದ್ದರೇ?

ಬಿಹಾರ ವಿಧಾನಸಭಾ ಚುನಾವಣೆಯ ಎರಡನೇ ಹಂತಕ್ಕೆ ಕೇವಲ ಒಂದು ದಿನ ಮೊದಲು, ಸೋಮವಾರ ಸಂಜೆ (ನವೆಂಬರ್ 10, 2025) ನವದೆಹಲಿಯ ಕೆಂಪು ಕೋಟೆ ಬಳಿ ಸಂಭವಿಸಿದ ಕಾರು ಸ್ಫೋಟದಲ್ಲಿ ಕನಿಷ್ಠ ಒಂಬತ್ತು ಜನರು ಸಾವನ್ನಪ್ಪಿದರು ಮತ್ತು ಹಲವಾರು ಜನರು ಗಾಯಗೊಂಡರು.

ಈ ಘಟನೆಯ ನಂತರ, ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಬಿಹಾರದ ಮತದಾರರಿಗೆ ಬಿಜೆಪಿ  ಬೆಂಬಲಿಸಿ ಅಥವಾ ದೆಹಲಿ ಸ್ಫೋಟದಂತೆಯೇ ಪರಿಣಾಮಗಳನ್ನು ಎದುರಿಸಿ ಎಂದು ಎಚ್ಚರಿಕೆ ನೀಡುತ್ತಿರುವ ವೀಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ಕಾಣಿಸಿಕೊಂಡಿದೆ.

” ದೆಹಲಿಯಲ್ಲಿ ನಡೆದದ್ದು ಬಿಹಾರದಲ್ಲೂ ಆಗಬಹುದು ಎಂದು ನಾನು ಬಿಹಾರದ ಜನರಿಗೆ ಮನವಿ ಮಾಡುತ್ತೇನೆ. ನಮ್ಮ ಯುವಕರು ತಮ್ಮ ಕರ್ತವ್ಯವನ್ನು ಪ್ರದರ್ಶಿಸಲು ನಾವಿನ್ನೂ ತ್ರಿಶೂಲ್ ಅನ್ನು ಪ್ರಾರಂಭಿಸಿಲ್ಲ. ನಾವು ಹಿಂದೂ ರಾಷ್ಟ್ರವನ್ನು ನಿರ್ಮಿಸಬೇಕು” ಎಂದು ಮುಖ್ಯಮಂತ್ರಿ ಹೇಳುತ್ತಿರುವುದು ವೀಡಿಯೋದಲ್ಲಿ ಕೇಳಿಬರುತ್ತಿದೆ.

” ಈ ಹಿಂದೂ ರಾಷ್ಟ್ರಕ್ಕಾಗಿ, ಕೇವಲ ಎಂಟು ಜನರಲ್ಲ, ನಾವು 800 ಜನರನ್ನು ತ್ಯಾಗ ಮಾಡಬೇಕಾದರೂ ಸಹ, ನಾವು ಅದನ್ನು ಮಾಡುತ್ತೇವೆ. ಆದರೆ ನೀವು ನಮ್ಮನ್ನು ಆಯ್ಕೆಮಾಡಬೇಕಷ್ಟೆ. ನಾಳೆ 2 ನೇ ಹಂತದಲ್ಲಿ ನೀವು ಬಿಜೆಪಿ ವಿರುದ್ಧ ಮತ ಚಲಾಯಿಸಿದರೆ, ಅದರ ಪರಿಣಾಮಗಳನ್ನು ನೀವು ಅನುಭವಿಸಬೇಕಾಗುತ್ತದೆ.” ಎಂದಿದೆ.

Also Read: ದೆಹಲಿ ಕಾರು ಸ್ಫೋಟದ ಫೋಟೋ ಎಂದು ಲೆಬನಾನ್ ಸ್ಫೋಟದ ಫೋಟೋ ವೈರಲ್

Evidence

“CM Yogi,” “Bihar,” ಮತ್ತು “Delhi blast” ಎಂಬ ಕೀವರ್ಡ್‌ಗಳನ್ನು ಬಳಸಿಕೊಂಡು Google ನಲ್ಲಿ ಹುಡುಕಿದಾಗ ಆದಿತ್ಯನಾಥ್ ಅವರನ್ನು ಅಂತಹ ಹೇಳಿಕೆಗೆ ಲಿಂಕ್ ಮಾಡುವ ಯಾವುದೇ ವರದಿಗಳು ಬಂದಿಲ್ಲ. ಉತ್ತರ ಪ್ರದೇಶ ಮುಖ್ಯಮಂತ್ರಿಯ ಯಾವುದೇ ಅಧಿಕೃತ ಸಾಮಾಜಿಕ ಮಾಧ್ಯಮ ಹ್ಯಾಂಡಲ್‌ಗಳು ( ಇಲ್ಲಿ , ಇಲ್ಲಿ ಮತ್ತು ಇಲ್ಲಿ ನೋಡಿ ) ಅಂತಹ ಯಾವುದೇ ಸಂದೇಶವನ್ನು ಹೊಂದಿಲ್ಲ.

ವೈರಲ್ ವೀಡಿಯೋದ ಕೀಫ್ರೇಮ್‌ಗಳ ರಿವರ್ಸ್ ಇಮೇಜ್ ಸರ್ಚ್ ವೇಳೆ ದಿ ಪ್ರಿಂಟ್‌ನ ಯೂಟ್ಯೂಬ್ ಲೈವ್‌ಸ್ಟ್ರೀಮ್‌ ಲಭ್ಯವಾಗಿದೆ. ಇದರ ವಾಟರ್‌ಮಾರ್ಕ್ ಅನ್ನು ಅಕ್ಟೋಬರ್ 31, 2025 ರಂದು ರೆಕಾರ್ಡ್ ಮಾಡಲಾದ ವೈರಲ್ ಕ್ಲಿಪ್‌ನಲ್ಲಿ ಕಾಣಬಹುದು, ಇದು ಸಿಎಂ ಯೋಗಿ ಆದಿತ್ಯನಾಥ್ ಅವರು ನವೆಂಬರ್ 10, 2025 ರಂದು ದೆಹಲಿ ಸ್ಫೋಟಕ್ಕೆ ಬಹಳ ಮೊದಲು ಬಿಹಾರದ ಸಿವಾನ್‌ನಲ್ಲಿ ನಡೆದ ರಾಲಿಯನ್ನು ಉದ್ದೇಶಿಸಿ ಮಾತನಾಡುತ್ತಿರುವುದನ್ನು ತೋರಿಸುತ್ತದೆ. ಇದು ವೈರಲ್ ಕ್ಲಿಪ್‌ನಲ್ಲಿ ಕಂಡುಬರುವ ಅದೇ ಸಾಮ್ಯತೆಯನ್ನು ಹೊಂದಿದೆ.

ನಾವು ಸಂಪೂರ್ಣ ಭಾಷಣವನ್ನು ಪರಿಶೀಲಿಸಿದ್ದೇವೆ, ಆದರೆ ಸಿಎಂ ಯೋಗಿ ಆದಿತ್ಯನಾಥ್ ಅಂತಹ ಹೇಳಿಕೆಯನ್ನು ನೀಡುತ್ತಿರುವುದು ಕಂಡುಬಂದಿಲ್ಲ.

ವೈರಲ್ ಕ್ಲಿಪ್ ಅನ್ನು ಸೂಕ್ಷ್ಮವಾಗಿ ವಿಶ್ಲೇಷಿಸಿದಾಗ, ನಾವು ಹಲವಾರು ಅಸಹಜತೆ ಗಮನಿಸಿದ್ದೇವೆ. ಮುಖ್ಯಮಂತ್ರಿಯವರ ಕೆಳ ದವಡೆಯ ಪ್ರದೇಶವು ಸ್ವಲ್ಪ ಮಸುಕಾಗಿ ಕಂಡುಬಂದಿದೆ, ಮತ್ತು ಮೂಲ ವೀಡಿಯೋದಲ್ಲಿ ಸ್ಪಷ್ಟವಾಗಿ ಗೋಚರಿಸುವ ಕಿವಿಯೋಲೆಯು ವೈರಲ್ ದೃಶ್ಯಗಳಲ್ಲಿ ಚರ್ಮದೊಂದಿಗೆ ಸೇರಿದಂತೆ ಕಾಣುತ್ತದೆ. ಅವರ ಕುರ್ತಾದ ಗುಂಡಿಗಳು ಸಹ ವಿರೂಪಗೊಂಡಂತೆ ಕಂಡುಬಂದವು, ಮತ್ತು ಹಿನ್ನೆಲೆಯಲ್ಲಿರುವ ಪೋಸ್ಟರ್‌ನ ಚಿತ್ರವೂ ಮಾರ್ಫಿಂಗ್ ಮಾಡಿದಂತೆ ಕಂಡುಬಂದಿದೆ.  ಇದು ಕೂಡ ಡಿಜಿಟಲ್ ಕುಶಲತೆಯ ಚಿಹ್ನೆಗಳನ್ನು ಸೂಚಿಸುತ್ತದೆ.

ಇದಲ್ಲದೆ, ವೈರಲ್ ಕ್ಲಿಪ್‌ನಲ್ಲಿ ಮುಖ್ಯಮಂತ್ರಿಯವರ ಸ್ವರ ಮತ್ತು ಮಾತಿನ ತೀವ್ರತೆ ಅವರ ನಿಜವಾದ ಭಾಷಣ ಮಾದರಿಗೆ ಸ್ವಾಭಾವಿಕವಾಗಿ ಹೊಂದಿಕೆಯಾಗುವುದಿಲ್ಲ. ಜೊತೆಗೆ ಹಿನ್ನೆಲೆಯಲ್ಲಿ ನಿಂತಿದ್ದ ಓರ್ವ ಭದ್ರತಾ ಸಿಬ್ಬಂದಿ ವೈರಲ್ ವೀಡಿಯೋದಲ್ಲಿ ಕಾಣಿಸುವುದಿಲ್ಲ.  

ಹೈವ್ ಮಾಡರೇಶನ್ ಬಳಸಿ ವಿಶ್ಲೇಷಿಸಿದಾಗ , ಕ್ಲಿಪ್ AI- ರಚಿತ ಅಥವಾ ಡೀಪ್‌ಫೇಕ್ ವಿಷಯವಾಗಿರುವ 99.3% ಸಂಭವನೀಯತೆಯನ್ನು ತೋರಿಸಿದೆ.

Verdict

ಯೋಗಿ ಆದಿತ್ಯನಾಥ್ ಅವರು ಬಿಹಾರದ ಮತದಾರರು ಬಿಜೆಪಿಯನ್ನು ಆಯ್ಕೆ ಮಾಡದಿದ್ದರೆ ದೆಹಲಿ ಸ್ಫೋಟದಂತಹ ಪರಿಣಾಮ ಎದುರಿಸಬೇಕಾಗಬಹುದು ಎಂದು ಬೆದರಿಕೆ ಹಾಕಿದ್ದಾಗಿ ಹೇಳುವ ವೈರಲ್ ವೀಡಿಯೋ ನಕಲಿಯಾಗಿದೆ. ಈ ಕ್ಲಿಪ್ ಅನ್ನು ಹಳೆಯ ದೃಶ್ಯಗಳನ್ನು ಬಳಸಿಕೊಂಡು ತಿರುಚಲಾಗಿದೆ ಎಂದು ಕಂಡುಬಂದಿದೆ.  

Also Read: ಚಂದ್ರಾಪುರದಲ್ಲಿ ವ್ಯಕ್ತಿಯ ಮೇಲೆ ಹುಲಿ ದಾಳಿ, ವೈರಲ್ ಆಗಿರುವ ವಿಡಿಯೋ ಎಐನಿಂದ ಮಾಡಿದ್ದು!

FAQ ಗಳು

Q 1. ದೆಹಲಿ ಸ್ಫೋಟದ ನಂತರ ಯೋಗಿ ಆದಿತ್ಯನಾಥ್ ಬಿಹಾರ ಮತದಾರರಿಗೆ ಬೆದರಿಕೆ ಹಾಕಿದ್ದಾರೆಯೇ?
ಇಲ್ಲ. ವೈರಲ್ ವೀಡಿಯೋವನ್ನು ತಪ್ಪು ಮಾಹಿತಿಯನ್ನು ಹರಡಲು ತಾಂತ್ರಿಕವಾಗಿ ತಿರುಚಲಾಗಿದೆ.

Q 2. ಮೂಲ ವೀಡಿಯೋವನ್ನು ಯಾವಾಗ ರೆಕಾರ್ಡ್ ಮಾಡಲಾಗಿದೆ?
ದೆಹಲಿ ಸ್ಫೋಟ ಸಂಭವಿಸುವ ಮೊದಲು ಅಕ್ಟೋಬರ್ 31, 2025 ರಂದು ಬಿಹಾರದ ಸಿವಾನ್‌ನಲ್ಲಿ ನಡೆದ ರಾಲಿಯದ್ದಾಗಿದೆ.

Q 3. ಡೀಪ್‌ಫೇಕ್‌ಗಳನ್ನು ಹೇಗೆ ಪತ್ತೆ ಮಾಡಬಹುದು?
ಹೈವ್ ಮಾಡರೇಶನ್‌ನಂತಹ AI ಪತ್ತೆ ಪರಿಕರಗಳು ದೃಶ್ಯಗಳು, ಬೆಳಕು ಮತ್ತು ಆಡಿಯೋದಲ್ಲಿನ ಅಸಹಜತೆಯನ್ನು ವಿಶ್ಲೇಷಿಸಿ ಕುಶಲತೆಯಿಂದ ಕೂಡಿದ ದೃಶ್ಯಗಳನ್ನು ಗುರುತಿಸುತ್ತವೆ. 

Sources
YouTube Video By The Print, Dated: October 31, 2025

Hive Moderation Website

Self Analysis

(ಈ ವರದಿಯನ್ನು ಮೊದಲು ನ್ಯೂಸ್‌ಚೆಕರ್ ಇಂಗ್ಲಿಷ್ ನಲ್ಲಿ ಪ್ರಕಟಿಸಲಾಗಿದ್ದು ಅದು ಇಲ್ಲಿದೆ)