लखनऊ न्यायालयात हजेरी लावताना न्यायाधीशांनी राहुल गांधींसोबत सेल्फी काढली?

लखनऊ न्यायालयात हजेरी लावताना न्यायाधीशांनी राहुल गांधींसोबत सेल्फी काढली असे एका फोटोच्या माध्यमातून सांगणारा दावा सोशल मीडियावर व्हायरल झाला आहे.

X च्या बरोबरीनेच हा दावा फेसबुकवरही अनेक युजर्सनी पोस्ट केल्याचे आम्हाला दिसून आले.

दाव्यांचे संग्रहण येथे आणि येथे पाहता येईल.

“न्याययोध्याच्या प्रेमात न्यायाधीशही…” असे संबंधित व्हायरल फोटोवर लिहिलेले असून “लखनऊ येथे एका सुनावणीसाठी राहुल गांधी @RahulGandhi हजर राहिले असता न्यायाधीश महोदयांना देखील त्यांच्यासोबत सेल्फी घ्यायचा मोह आवरला नाही. प्रेमाने जगही जिंकता येते. जननायक राहुल गांधी” अशा कॅप्शनखाली हा दावा केला जात आहे.

१५ जुलै रोजी दुपारी काँग्रेस खासदार राहुल गांधी भारतीय सैन्यावर केलेल्या टिप्पणीबद्दल लखनऊ न्यायालयात हजर झाले आणि त्यांनी तिथेच आत्मसमर्पण केले. तथापि, आत्मसमर्पण केल्यानंतर अवघ्या ५ मिनिटांत त्यांना जामीन मंजूर करण्यात आला. डिसेंबर २०२२ मध्ये भारत जोडो यात्रेदरम्यान राहुल गांधी यांनी भारतीय सैन्यावर भाष्य केले होते, त्यानंतर माजी बीआरओ संचालक उदय शंकर श्रीवास्तव यांनी राहुल गांधींविरुद्ध याचिका दाखल केली.

Fact Check/Verification

लखनऊ न्यायालयात हजेरी लावताना एका न्यायाधीशाने राहुल गांधींसोबत सेल्फी घेतल्याच्या व्हायरल दाव्याची चौकशी करताना, आम्हाला १५ जुलै २०२५ रोजी काँग्रेस नेत्या सुप्रिया श्रीनेत यांनी केलेली एक पोस्ट सापडली, ज्यामध्ये त्यांनी भाजप आयटी सेलचे प्रमुख अमित मालवीय यांनी केलेल्या याच दाव्याचे खंडन केले होते. सुप्रिया श्रीनेत यांनी त्यांच्या पोस्टमध्ये लिहिले होते की फोटो काढणारी व्यक्ती न्यायाधीश नाही तर वकील आहे.

दरम्यान, आम्हाला लखनऊ येथील पत्रकार गौरव सिंह सेंगर यांच्या फेसबुक अकाउंटवरून केलेली एक पोस्ट सापडली, ज्यामध्ये त्यांनी व्हायरल फोटो पोस्ट केला आणि लिहिले, “व्हायरल फोटो महत्त्वाचा आहे – फोटोमधील व्यक्ती वकील आहे, न्यायाधीश नाही. वकील सय्यद महमूद हसन आहेत. अफवा पसरवू नका आणि पसरवू देऊ नका!!”

तपासादरम्यान, आम्हाला सय्यद महमूद हसन यांचे फेसबुक अकाउंट देखील सापडले. या फेसबुक अकाउंटच्या About सेक्शनमध्ये, त्यांनी स्वतःचे वर्णन उच्च न्यायालय आणि दिवाणी न्यायालयाचे वकील म्हणून केले आहे.

आमच्या चौकशीत, आम्ही चित्रात दिसणारे सय्यद महमूद हसन यांच्याशीही संपर्क साधला. त्यांनी आम्हाला सांगितले की, “या चित्रात मीच आहे आणि मी न्यायाधीश नाही तर एक वकील आहे. मी लखनऊ उच्च न्यायालय आणि जिल्हा न्यायालयात प्रॅक्टिस करतो. मी राहुल गांधींच्या लखनऊ न्यायालयात हजेरीदरम्यान हा फोटो काढला होता”.

Conclusion

आमच्या तपासात सापडलेल्या पुराव्यांवरून हे स्पष्ट होते की लखनऊ न्यायालयात हजेरी लावताना न्यायाधीशांनी राहुल गांधींसोबत सेल्फी काढल्याचा दावा खोटा आहे. हे छायाचित्र लखनऊ न्यायालयाचे वकील सय्यद महमूद यांनी काढले आहे.

Our Sources
X Post by Supriya Shrinate on 15th July 2025
Facebook Post by Gaurav Singh Sengar on 15th July 2025
Telephonic Conversation with Syed Mahmood Hasan

(हे आर्टिकल न्यूजचेकर हिंदीसाठी रुंजय कुमार यांनी केलेले असून ते येथे वाचता येईल.)