کیا وائرل ویڈیو واقعی غزہ کا محاصرہ توڑنے کے لئے روانہ ہوئے بحری جہاز کے قافلے کی ہے؟ پوری حقیقت یہاں پڑھیں

سوشل میڈیا پر ایک ویڈیو بڑے پیمانے پر شیئر کی جا رہی ہے، جس میں سینکڑوں کشتیاں سمندر میں ایک ساتھ دکھائی دے رہی ہیں۔ صارفین کا دعویٰ ہے کہ یہ 44 ممالک پر مشتمل کشتیوں کا قافلہ ہے، جو غزہ کا محاصرہ توڑنے کے لئے سمندر میں روانہ ہو چکا ہے اور اسرائیل نے بھی اس قافلے کو روکنے کا اعلان کیا ہے۔

وائرل پوسٹ کا آرکائیو لنک یہاں اور یہاں دیکھیں۔

Fact Check/Verification

ویڈیو کو بغور دیکھنے کے بعد نیوز چیکر نے اس کے چند فریمز کو ریورس امیج سرچ کے ذریعے تلاش کیا۔ نتیجے میں یہ بات سامنے آئی کہ وائرل ویڈیو کا غزہ یا کسی سیاسی قافلے سے کوئی تعلق نہیں ہے۔ حالانکہ 17 ستمبر کو شائع ہونے والی اے ایف پی کی ایک رپورٹ کے مطابق تقریباً 50 بحری جہاز کے قافلے سمندر کے راستے غزہ کے لئے رواں دواں ہیں۔

تحقیقات کے دوران ہمیں یہی ویڈیو چینی ویڈیو پلیٹ فارم بیلی بیلی پر چینی کیپشن کے ساتھ ملی، جسے ترجمہ کرنے پر معلوم ہوا کہ ایک ستمبر 2025 کو “ماہی گیری کے سیزن کے آغاز” کے عنوان سے اس ویڈیو کو شیئر کیا گیا تھا۔ مزید گوگل ترجمہ سے معلوم ہوا کہ یہ کشتیاں تجارتی اور ماہی گیری کے مقصد سے روانہ ہو رہی ہیں۔

مزید تحقیق کے دوران ہمیں یہی ویڈیو چائنا پلس نیوز کے آفیشل فیس بک پیج پر بھی موصول ہوئی، جہاں اس کے بارے میں واضح طور پر بتایا گیا ہے کہ یہ منظر چین کے صوبے لیاؤننگ کے شہر یانٹائی کی مشہور فشنگ پورٹ (ماہی گیری بندرگاہ) کا ہے۔ رپورٹ کے مطابق یہ فوٹیج ہر سال ماہی گیری کے نئے سیزن کے آغاز پر ریکارڈ کی جاتی ہے، جب ہزاروں کشتیوں کو ایک ساتھ سمندر میں بھیجا جاتا ہے۔ یہ ایک روایتی منظر ہے جس میں ماہی گیر اپنی کشتیوں کو جھنڈوں اور رنگین لائٹوں سے سجاتے ہیں اور باضابطہ طور پر ماہی گیری کی سرگرمیوں کا آغاز کرتے ہیں۔

اس کے علاوہ بیسٹل پوسٹ گلوبل نے بھی ایک ستمبر 2025 کو یہی ویڈیو اپنی ویب سائٹ پر شائع کی ہے۔ جس کے مطابق یہ منظر چین کے ماہی گیری بیڑے کا ہے، جو ہر سال ایک خاص دن پر باضابطہ طور پر سمندر کی طرف روانہ ہوتے ہیں۔ یہ روایت چین کے لیاؤننگ صوبے میں موجود یانٹائی فشنگ پورٹ سے جڑی ہے، جہاں ہزاروں کشتیوں کو ایک ساتھ سمندر میں بھیجا جاتا ہے۔ یہ عمل نہ صرف ماہی گیری کے سیزن کے آغاز کی علامت ہے بلکہ مقامی سطح پر اسے ایک بڑے تہوار کی شکل بھی حاصل ہے۔

Conclusion

نیوزچیکر کی تحقیقات میں یہ واضح ہوا کہ وائرل ویڈیو غزہ کے لئے کسی 44 ممالک کے قافلے کی نہیں بلکہ چین کی یانٹائی بندرگاہ سے روانہ ہونے والے ماہی گیر جہازوں کی ہے۔

Video post by Bilibili on 01 Sep 2025
Facebook post by chinaplusnews on 03 Sep 2025
Report published by Bastille Post Global on 01 Sep 2025