7برس قبل پرچم کشائی کے دوران امت شاہ سے ہوئی غلطی کی ویڈیو گمراہ کن دعوے کے ساتھ وائرل

سوشل میڈیا پر ایک ویڈیو خوب گردش کر رہی ہے جس میں بھارتی وزیر داخلہ امت شاہ کو ویڈیو میں دیکھا جا سکتا ہے کہ جب وہ پرچم کشائی کے دوران اس کی رسی کھینچتے ہیں تو اُس وقت ترنگا نچلی سطح پر آ جاتا ہے، مگر وہ فوراً ہی رسی ٹھیک کرتے ہوئے بھارتی پرچم کو مکمل طور پر لہرا تے ہیں۔ صارفین کا دعویٰ ہے کہ 15 اگست 2025 کو وزیر داخلہ امت شاہ نے بھارتی پرچم لہرانے کے بجائے اس کی بے حرمتی کر دی۔

ویڈیو کے ساتھ ایک فیس بک صارف نے لکھا ہے “بھارت اِس قدر بوکھلاہٹ کا شکار ہے کہ امت شاہ سے اپنا ترنگا تک سنبھالا نہ گیا، جیسے بھارتی رافیل پاکستانی پائلٹس کی مہارت کا شکار بنے، ویسے ہی امت شاہ نے بھارتی ترنگے کی تذلیل کرا دی”۔

آرکائیو لنک یہاں، یہاں اور یہاں دیکھیں۔

Fact Check/Verification

وائرل ویڈیو کے ایک فریم کو ہم نے سب سے پہلے گوگل لینس کی مدد سے تلاش کیا۔ اس دوران اس واقعے سے متعلق 15 اگست 2018 کو شائع ہونے والی خبریں آج تک اور این ڈی ٹی وی کی ویب سائٹس پر موصول ہوئیں۔

آج تک نے اپنی رپورٹ میں وائرل ویڈیو کے اسکرین شارٹ کو فیچر امیجز کے طور پر استعمال کیا ہے۔ رپورٹ میں لکھا ہے کہ 15 اگست 2018 کو 72 ویں یوم آزادی کے موقع پر بھارتیہ جنتا پارٹی کے قومی صدر امت شاہ نے پرچم کشائی کی۔ اس دوران جیسے ہی امت شاہ نے ترنگا لہرانے کے لئے رسی کھینچی تو ترنگا نیچے گر گیا۔ کانگریس پارٹی نے ایکس پر اس واقعہ کا ویڈیو شیئر کرکے بی جے پی کو نشانہ بنایا۔

مزید تحقیقات کے دوران ہمیں اس واقعے کا لائیو اسٹریم ویڈیو 15 اگست 2018 کو بی جے پی کے فیس بک اکاؤنٹ سے ملا، ویڈیو میں دیکھا جا سکتا ہے کہ رسی کھینچتے وقت بھارتی قومی پرچم گر جاتا ہے، تاہم امت شاہ فوراً رسی کو صحیح کرتے ہیں اور اسے کھینچ کر جھنڈا لہراتے ہیں۔ یہ ویڈیو اصل میں 15 اگست 2018 کو بی جے پی کے مرکزی دفتر (نیشنل ہیڈکواٹر) پر ترنگا لہرانے کے دوران پیش آئے واقعے کی ہے۔

Conclusion

لہٰذا ہماری تحقیقات سے یہ ثابت ہوا کہ وائرل کلپ حالیہ نہیں بلکہ 2018 کے ایک پرانے واقعے کی ہے۔ اسے 2025 کی یومِ آزادی سے منسوب کرکے گمراہ کن دعوے کے ساتھ شیئر کیا جا رہا ہے۔

Sources
Reports published by AajTak and NDTV on 15 Aug 2018
Facebook post by Bharatiya Janata Party (BJP) on 15 Aug 2018