ریپبلک ٹی وی کے اینکر ارنب گوسوامی کی گرفتاری کی پرانی ویڈیو فرضی دعوے کے ساتھ وائرل

ویڈیو سے متعلق صارفین کا دعویٰ ہے کہ بھارت کے معروف ٹی وی چینل ریپبلک ٹی وی کے اینکر ارنب گوسوامی کو کراچی سمیت پورے پاکستان پر قبضے کی جھوٹی خبریں شائع کرنے کے الزام میں آج یعنی (21 مئی) کو پولس نے گرفتار کرلیا ہے۔

رواں ماہ کی 6 اور 7 تاریخ کی رات میں بھارت نے پاکستان پر آپریشن سندور کو انجام دیا تھا۔ جس کے بعد سوشل میڈیا پر فرضی خبروں کا سیلاب آگیا۔ اب اسی تناظر میں ریپبلک ٹی وی کا 50 سکینڈ پر مشتمل ایک کلپ وائرل ہو رہا ہے، جس میں ریپبلک ٹی وی کے معروف اینکر ارنب گوسوامی پولس کی گاڑی کے اندر سے کچھ بولتے ہوئے دکھائی دے رہے ہیں۔

Fact Check/Verification

پاکستان پر قبضے کی خبر چلانے کے الزام میں ریپبلک ٹی وی کے اینکر ارنب گوسوامی کی گرفتاری کا بتاکر شیئر کی گئی ویڈیو کے ایک فریم کو گوگل لینس پر سرچ کیا۔ اس دوران ہمیں اسی ویڈیو کا طویل ورژن ریپبلک ورلڈ کے آفیشل یوٹیوب چینل پر 8 نومبر 2020 کو اپلوڈ شدہ موصول ہوا۔

ویڈیو کے عنوان میں لکھا ہے “میری جان کو خطرہ ہے’: ارنب گوسوامی پر حملہ، جیل منتقل، وکلاء سے بات کرنے کی اجازت نہیں دی گئی”۔

مزید تحقیقات کے دوران ہمیں 4 نومبر 2020 کو شائع ہونے والی دینک جاگرن کی ایک رپورٹ موصول ہوئی۔ جس میں ریپبلک ٹی وی کے اینکر ارنب گوسوامی کی گرفتاری سے متعلق لکھا ہے کہ ممبئی پولس نے ریپبلک ٹی وی کے ایڈیٹر ان چیف ارنب گوسوامی کو گرفتار کیا ہے۔ دراصل ارنب پر الزام تھا کہ ممبئی کے ایک انٹیریر ڈیزائنر انوے نائک کو خودکشی کے لئے اکسایا تھا۔ یہاں یہ واضح ہوگیا کہ وائرل کلپ پرانی ہے۔

مزید تصدیق کےلئے ہم نے گوگل پر “ریپلک ٹی وی اینکر ارنب گرفتار” کیورڈ سرچ کیا تو دی ہندو کی 22 مئی کو شائع ہونے والی ایک رپورٹ موصول ہوئی۔ جس کے مطابق کرناٹک کی ہائی کورٹ نے 21 مئی کو بی جے پی آئی ٹی سیل کے سربراہ امت مالویہ اور ریپبلک ٹی وی کے چیف ایڈیٹر ارنب گوسوامی کے خلاف انڈین یوتھ کانگریس (آئی وائی سی) کی طرف سے مبینہ طور پر کانگریس اور اس کے رہنما راہل گاندھی کو “جھوٹی” معلومات کے ذریعے بدنام کرنے کی شکایت کی بنیاد پر درج کی گئی پہلی معلوماتی رپورٹس (ایف آئی آرز) پر روک لگا دی ہے۔

Conclusion

لہٰذا انٹرنیٹ پر ملے شواہد سے یہ ثابت ہوا کہ ریپبلک ٹی وی کے اینکر ارنب گوسوامی کو پاکستان پر قبضے کی جھوٹی خبریں چلانے کے الزام میں گرفتار کئے جانے کا بتاکر شیئر کی گئی ویڈیو پرانی ہے اور اس کا بھارت-پاکستان کے مابین چل رہے حالیہ تنازہ سے کوئی تعلق نہیں ہے۔

Sources
Video report published by YouTube Channel Republic World on 08 Nov 2020
Report published by Dainik Jagran on 4 Nov 2020