کیا کشمیری حریت پسندوں کی جانب سے جموں و کشمیر میں بھارتی فوجیوں پر کئے گئے حملے کی ہے یہ ویڈیو؟ پوری حقیقت یہاں پڑھیں

ایکس پر ایک 36 سیکنڈ کی ویڈیو شیئر کر یہ دعویٰ کیا گیا کہ کشمیری حریت پسندوں نے جموں و کشمیر میں بھارتی فوجیوں پر حملہ کر دیا ہے۔ ویڈیو میں کچھ جوان جنگل سے گذرتے ہوئے نظر آ رہے ہیں اور ان کو گھیرے میں دکھایا جا رہا ہے، جن پر 1 سے 5 تک کی گنتی بھی لکھی گئی ہے۔ کچھ دیر بعد ہی ایک بڑا دھماکا ہو جاتا ہے۔

پوسٹ کے آرکائیو لنک یہاں دیکھیں۔

Fact Check/Verification

بھارتی فوجیوں پر کشمیری حریت پسندوں کی جانب سے کئے حملے کا بتاکر شیئر کی گئی ویڈیو کی تحقیقات کے لئے ہم نے سب سے پہلے ویڈیو کے کیفریم کو گوگل لینس کی مدد سے تلاش کیا۔ اس دوران ہمیں ابوالمالی نامی ایکس ہینڈل پر ہوبہو ویڈیو ملی۔ اس ویڈیو کو 25 فروری 2024 کو اپلوڈ کیا گیا تھا اور اسے “کشمیر کے پونچھ-راجوری علاقے میں کشمیری باغیوں کے ذریعہ بارودی سرنگ کے حملے میں 5 بھارتی فوجیوں کو ہلاک کرنے کی تازہ فوٹیج” بتایا گیا ہے۔

مزید سرچ کے دوران ہمیں دی کھوراسان ڈائری نامی ایکس ہینڈل پر ہوبہو ویڈیو کے ساتھ شیئر کی گئی دیگر تصاویر ملیں۔ یہ پوسٹ 4 فروری 2024 کو کیا گیا تھا اور اس کے ساتھ انگریزی زبان میں کیپشن موجود ہے، جس کے مطابق پیپلز اینٹی فاشسٹ فرنٹ(پی اے ایف ایف) نے پونچھ- راجوری علاقے میں ایک بارودی سرنگ کے حملے میں 5 بھارتی سیکیورٹی فورسز کے اہلکاروں کو نشانہ بنانے کا تازہ فوٹیج جاری کیا ہے۔

اس کے علاوہ ٹریک ٹیریرزم کے مستند ایکس ہینڈل پر بھی 5 فروری 2024 کو شیئر شدہ ایک پوسٹ ملی۔ جس میں ویڈیو سے ملتی جلتی تصویر کا استعمال کیا گیا ہے اور بتایا ہے کہ “پی اے ایف ایف نے ایک پروپیگنڈا ویڈیو جاری کیا جس میں آئی ای ڈی دھماکے میں پانچ بھارتی فوجیوں کی ہلاکت کو دکھایا گیا ہے”۔

ہماری تحقیقات سے یہ تو واضح ہو گیا کہ یہ ویڈیو پرانی ہے لیکن ہم آزادانہ طور پر یہ تصدیق نہیں کر سکتے کہ ویڈیو کب کی ہے اور کہاں کی ہے۔

البتہ ہم نے یہ تلاش کرنے کی کوشش کی کہ آیا کشمیر میں حالیہ دنوں میں بھارتی فوجیوں پر ایسا کوئی حملہ ہوا ہے یا نہیں؟ لیکن گوگل پر ہمیں ایسی کوئی معتبر خبر نہیں موصول ہوئی جس میں بھارتی فوجیوں پر کسی حالیہ حملے کا ذکر ہو۔

Conclusion

لہٰذا ہماری تحقیقات سے واضح ہوا کہ پرانی ویڈیو کو کشمیری حریت پسندوں کی جانب سے جموں و کشمیر میں بھارتی فوجیوں پر کئے گئے حملے کا بتاکر شیئر کیا گیا ہے۔

Sources
X posts by @abulmaali_ , @khorasandiary and @TracTerrorism on Feb 2024