جنرل انیل چوہان کی مودی حکومت پر تنقید والی ویڈیو ڈیپ فیک نکلی

سوشل میڈیا پر پاکستانی صارفین کی جانب سے ایک ویڈیو بڑے پیمانے پر شیئر کی جا رہی ہے، جس میں دعویٰ کیا جا رہا ہے کہ بھارتی چیف آف ڈیفنس اسٹاف (سی ڈی ایس) جنرل انیل چوہان نے مودی حکومت پر شدید تنقید کی ہے۔

فیس بک صارف نے ویڈیو کے ساتھ  لکھا ہے ”بھارتی چیف آف ڈیفنس اسٹاف انیل چوہان نے بہار مودی حکومت پر شدید تنقید کرتے ہوئے کہا: مودی بہار کا الیکشن ہار رہا اسلئے وہ پھر سے بھارت-پاکستان جنگ کا ماحول بنا کر بھارتی فوج کو اپنے سیاسی مقاصد کے لئے استعمال کرنا چاہتا ہے۔”

Fact Check/Verification

نیوز چیکر کی ٹیم نے سب سے پہلے وائرل ویڈیو کے چند فریمز کا ریورس امیج سرچ کیا۔ اس دوران ٹیم کو جنرل انیل چوہان کی وائرل ویڈیو سے مشابہت رکھنے والی اصل ویڈیو نیوز ایجنسی اے این آئی کے آفیشل یوٹیوب چینل پر 9 نومبر 2025 کو اپلوڈ شدہ ملی۔ سی ڈی ایس جنرل انیل چوہان کی یہ ویڈیو چنڈی گڑھ کی ہے، جہاں وہ بھارتی بحریہ کی طاقت کو اجاگر کرتے ہوئے چین کی معاشی کمزوری پر گفتگو کر رہے ہیں۔

ٹیم نے دونوں ویڈیوز کا تقابلی جائزہ لیا تو کئی تضادات سامنے آئے۔ اے این آئی کی ویڈیو میں جنرل انیل چوہان ٹھہر ٹھہر کر بات کرتے نظر آتے ہیں، جبکہ وائرل ویڈیو میں آواز غیر فطری روانی کے ساتھ چلتی ہے۔ لب و لہجہ اور آواز اصل ویڈیو سے غیر مطابقت رکھتی ہے۔ چہرے کی حرکات اور الفاظ کے تلفظ میں بھی فرق پایا گیا۔ اس کے علاوہ جب جنرل انیل چوہان بولتے ہیں تو بعض فریمز میں ان کے دانت غائب دکھائی دیتے ہیں اور جو اے آئی کے ذریعے کی گئی تبدیلی کی واضح علامت ہے۔ یہ تمام اشارے ظاہر کرتے ہیں کہ وائرل ویڈیو مصنوعی طور پر تبدیل کی گئی ہے۔

مزید تحقیق کے دوران ہمیں حکومتِ ہند کی فیکٹ چیک یونٹ، پریس انفارمیشن بیورو (پی آئی بی)، کی جانب سے 11 نومبر 2025 کو شیئر کردہ ایک پوسٹ ملی۔ اس میں واضح کیا گیا ہے کہ: ”چیف آف ڈیفنس اسٹاف جنرل انیل چوہان نے ایسا کوئی بیان نہیں دیا۔ وائرل ویڈیو ڈیپ فیک ہے، جسے بھارتی مسلح افواج کے اعتماد کو مجروح کرنے کے لئے تیار کیا گیا ہے”۔

یہ بھی پڑھیں: کیا بھارتی فوج نے ”غیر ہندو فوجیوں کو برطرف کرنے کا اعلان کیا؟

Conclusion 

اس طرح نیوز چیکر کی تحقیق میں یہ معلوم ہوا کہ وائرل ویڈیو میں جنرل انیل چوہان کے نام سے منسوب بیان ایک ڈیپ فیک کلپ ہے۔ اصل ویڈیو میں انہوں نے مودی حکومت یا بہار الیکشن کے بارے میں کوئی تبصرہ نہیں کیا۔ لہٰذا یہ دعویٰ غلط ثابت ہوا۔

Sources
Video published by YouTube Channel ANI News on 9 Nov 2025
Self Analysis
X post by @PIBFactCheck on 11 Nov 2025