کیا بہار کے ایک مسلم لڑکے نے بنا دیا فضاء میں اڑنے والا طیارہ؟ نہیں، یہ ویڈیو بنگلہ دیش کی ہے

سوشل نٹورکنگ سائٹس فیس بک اور انسٹاگرام پر ایک ویڈیو شیئر کی جا رہی ہے جس میں دعویٰ کیا جا رہا ہے کہ بہار کے ایک مسلم لڑکے نے ایک ہوائی جہاز بنایا ہے۔ ویڈیو میں خود ساختہ طیارے کو زمین پر دوڑتے اور پھر فضاء میں ٹیک آف کرتے ہوئے دیکھا جا سکتا ہے۔ اس میں ایک نوجوان بیٹھا ہوا نظر آرہا ہے اور جہاز کے پچھلے حصے میں ایک گھومتا ہوا پنکھا بھی نصب ہے جب کہ اردگرد لوگوں کا ہجوم نظر آرہا ہے۔

Fact Check/Verification

وائرل ویڈیو کے چند فریموں کو سب سے پہلے ہم نے گوگل لینس پر تلاش کیا۔ اس دوران ہمیں یہی ویڈیو 9 مارچ 2025 کو ‘کرشن ٹی وی‘ نامی فیس بک پیج پر شیئر شدہ موصول ہوئی۔ ویڈیو میں بنگلہ کیپشن کے ساتھ لکھا گیا کہ یہ کلپ بنگلہ دیش کے مانک گنج کی ہے اور یہ طیارہ کسان کے بیٹے جولھاس نے بنایا ہے۔

متعلقہ کیورڈ کے ذریعے تلاش کرنے پر ہمیں مارچ میں شائع ہونے والی متعدد بنگلہ دیشی میڈیا آؤٹلیٹ کی رپورٹس ملیں، جس میں گھریلو ساختہ طیارہ بنانے والے نوجوان کی شناخت 28 سالہ جولہاس مولا کے طور پر کی گئی ہے۔ جولھاس ایک الیکٹرانک مکینک ہے اور ان کا تعلق مانک گنج کے شیبالا اپزہ کے شیتاگر تیوٹا گاؤں سے ہے۔

دی ڈیلی اسٹار کی ویب سائٹ پر 6 مارچ کو شائع ایک رپورٹ میں بتایا گیا ہے کہ 4 مارچ 2025 کو یمنا ندی کے کنارے جعفر گنج میں ایک انوکھا نظارہ دیکھا گیا، جب جولہاس مولا نے اپنے ہاتھوں سے بنائے گئے الٹرا لائٹ طیارے کو کامیابی کے ساتھ اڑایا۔ اس پرواز کو دیکھنے کے لئے لوگوں کی ایک بڑی تعداد وہاں موجود تھی۔

رپورٹ میں مزید لکھا ہے کہ اس طیارے کا وزن 100 کیلو سے زائد تھا اور اسے جولہاس نے اپنے ہاتھوں سے بنایا تھا۔ اسے بنانے میں انہوں نے ایلومینیم، اسٹینلیس اسٹیل اور لوہے کا استعمال کیا تھا۔ ڈیجیٹل اسپیڈومیٹر سے لیس اور7 ہارس پاور کے عام واٹر پمپ انجن سے چلنے والا یہ طیارہ 50 فٹ کی بلندی تک پہنچا، جس کے بعد جولہاس نے اسے بحفاظت زمین پر اتارا۔

رپورٹ کے مطابق یوٹیوب ویڈیوز سے متاثر ہو کر انہوں نے چھوٹے آرسی طیاروں کو ڈیزائن اور اسمبل کرنا شروع کیا۔ جولہاس ریموٹ کنٹرول ماڈلز سے مطمئن نہیں تھے۔ وہ کچھ ایسا بنانا چاہتے تھے جسے وہ خود اڑا سکیں۔ 2021 میں، انہوں نے آرسی طیارہ بنانے کی کوشش کی۔ اس کے بعد انہوں نے مسلسل اس کے ڈیزائن پر کام جاری رکھا۔ آخر کار انہیں مارچ 2025 میں کامیابی ملی۔

فائنینشل پوسٹ سے بات کرتے ہوئے جولہاس نے طیارے کی قیمت اور اسے بنانے میں لگنے والے وقت کے بارے میں بتایا۔ جولہاس کے مطابق انہوں نے تین سال ریسرچ کی اور ایک سال طیارہ بنانے میں صرف کیا، جس کی کل لاگت تقریباً 8 لاکھ ٹکا تھی۔

دی ڈیلی سن کی رپورٹ میں بتایا گیا ہے کہ مانک گنج کے ڈپٹی کمشنر ڈاکٹر منور حسین ملا نے بھی جولہاس کو مزید تحقیق اور طیارے کی تعمیر کے لئے مالی مدد فراہم کرنے کے حکومتی منصوبے کا اعلان کیا ہے۔

اس حوالے سے ڈھاکہ ٹریبیون، چینل 24 اور اے ٹی این بنگلہ نیوز سمیت متعدد میڈیا آؤٹ لیٹس کی ویڈیو رپورٹس موجود ہیں، جن میں جولہاس کو جہاز اڑاتے ہوئے دیکھا جا سکتا ہے۔

جولہاس کا اپنا یوٹیوب چینل بھی ہے، جہاں وہ الٹرالائٹ طیارے سے متعلق معلومات اور ویڈیوز شیئر کرتے ہیں۔

Conclusion

لہٰذا نیوز چیکر کی تحقیقات سے واضح ہوا کہ بنگلہ دیش کے مانک گنج ضلع کے جولہاس مولا کے بنائے گئے طیارے کی ویڈیو کو بہار کے ایک مسلم لڑکے کی جانب سے تیار کئے گئے طیارے کا بتاکر شیئر کیا گیا ہے۔۔

Sources
Krishan TV Facebook post – March 9, 2025
The Daily Star report – March 6, 2025
Daily Sun report – March 4, 2025
Financial Post report – March 5, 2025
Dhaka Tribune YouTube video – March 4, 2025
Channel 24 YouTube video – March 5, 2025
ATN Bangla News YouTube video – March 4, 2025
Created by Julhas YouTube video – February 28, 2025

(اس آرٹیکل کو ہندی سے ترجمہ کیا گیا ہے۔)