کیا تباہ شدہ بھارتی رافیل اور سخوئی ایس یو-30 لڑاکا طیارے کی ہے یہ ویڈیو؟

Claim

بیتی رات بھارتی حکومت نے پاکستان میں موجود دہشت گردوں کے ٹھکانوں پر حملے کئے ہیں۔ جس کے بعد ایک ویڈیو شیئر کی جا رہی ہے، جس میں تباہ شدہ جنگی طیارہ نظر آرہا ہے اور چند افراد اس پر مٹی ڈالتے ہوئے نظر آرہے ہیں۔ صارفین کا دعویٰ ہے کہ یہ بھارتی رافیل اور سخوئی ایس یو-30 لڑاکا طیارے ہیں، جنہیں پاکستان نے مار گرایا ہے۔

Fact

ہم نے سب سے پہلے وائرل کلپ کو گوگل لینس پر سرچ کیا۔ اس دوران ہمیں لوسٹر مور ڈاٹ انفو نامی ویب سائٹ پر وائرل ویڈیو سے ملتے جلتے تباہ شدہ طیارے کی تصاویر موصول ہوئیں۔ جس کے ساتھ کیپشن میں ”معراج 5 ڈی پی اے2، 15 اپریل 2025 پاکستان” لکھا ہوا تھا۔ یہاں یہ واضح ہوا کہ تصویر پرانی ہے اور اس طیارے کا تعلق پاکستان سے ہے۔

پھر ہم نے گوگل پر “معراج 5 ڈی پی اے2، 15 اپریل 2025 پاکستان” کیورڈ سرچ کیا۔ تب ہمیں 16 اپریل 2025 کو وائرل ویڈیو کے اسکرین شارٹ کے ساتھ شائع ہونے والی دکن ہیرالڈ اور نیوز ڈرم نامی ویب سائٹ پر خبریں موصول ہوئیں۔ جس کے مطابق پاکستان میں پی اے ایف کا تربیتی طیارہ میراج وی روز لاہور سے 350 کلومیٹر جنوب مغرب میں ضلع وہاری کے نواحی علاقے رتہ ٹبہ کے کھیتوں میں گر کر تباہ ہوگیا۔

مزید تلاش کرنے پر ہمیں ہوبہو ویڈیو مشرق ٹی وی پی کے نامی انسٹاگرام پر 15 اپریل 2025 کو شیئر شدہ موصول ہوا۔ جس میں بھی اس ویڈیو کو پی اے ایف کا تربیتی طیارہ بتایا گیا ہے جو پاکستان کے رتہ ٹبہ میں حادثے کا شکار ہوگیا تھا۔

اس طرح نیوز چیکر کی تحقیقات سے یہ ثابت ہوا کہ جس تباہ شدہ طیارے کی ویڈیو کو بھارتی رافیل اور سخوئی ایس یو-30 لڑاکا طیارہ بتاکر شیئر کیا گیا ہے وہ پرانی ہے اور پاکستان کے جنگی طیارہ میراج کی ہے۔