پہاڑ پر تعمیر مکان مسمار کئے جانے کی یہ ویڈیو اتراکھنڈ نہیں بلکہ جموں کشمیر کے پونچھ کی ہے

سوشل میڈیا پر 1 منٹ 28 سیکنڈ کی ایک ویڈیو شیئر کی جا رہی ہے، جس میں پولس اہلکاروں کے ساتھ کچھ لوگ پہاڑ پر تعمیر مکان مسمار کرتے ہوئے نظر آرہے ہیں۔ صارفین کا دعویٰ ہے کہ بھارتی فوج اتراکھنڈ میں موجود مسلمانوں کی جائیداد پر زیرِ تعمیر گھر کو منہدم کر رہی ہے۔

ویڈیو کے ساتھ ایک فیس بک صارف نے کیپشن میں لکھا ہے “یہ ہے وہ بھارتی فوج جو ایک طرف پاکستان سے جنگ ہار گئی، اور دوسری جانب اتراکھنڈ میں موجود مسلمانوں کی جائیداد پر زیرِ تعمیر گھر کو مسمار کر رہی ہے۔ مودی کے بھارت میں انتہا پسند سوچ اس قدر سرائیت کر چُکی ہے کہ مسلمانوں کا نام و نشان مٹانے کے لیے ہر حد پار کر دی ہے”۔

Fact Check/Verification

بھارتی فوج کی جانب سے اتراکھنڈ میں مسلمانوں کی جائیداد پر زیرِ تعمیر مکان مسمار کئے جانے کا بتاکر شیئر کی گئی ویڈیو کے ایک فریم کو ہم نے سب سے پہلے گوگل لینس کی مدد سے تلاش کیا۔ اس دوران ہمیں جموں کشمیر کے صحافی طارق خان کی جانب سے 19 مارچ 2025 کو شیئر کی گئی ہوبہو ویڈیو موصل ہوئی۔ جس کے مطابق یہ ویڈیو جموں کشمیر کے پونچھ ضلع کے چھجلہ علاقے میں محکمہ جنگلات کی جانب سے غیر قانونی قبضے پر کی گئی کاروائی کی ہے۔

مزید تحقیقات کے دوران ہمیں نیوز نائن، راجوری نیوز اور پونچھ لائیو نامی یوٹیوب چینلز پر وائرل ویڈیو سے متعلق ویڈیوز موصول ہوئیں۔ جس کے ساتھ فراہم کردہ معلومات کے مطابق جموں و کشمیر میں ڈویژنل فاریسٹ آفیسر ندیم خان کی قیادت میں فاریسٹ پروٹیکشن ٹیم نے جنگلات کی اراضی پر غیر قانونی تعمیرات کو مسمار کیا۔ یہ کاروائی 19 مارچ، 2025 کو پونچھ کے مینڈھر میں جنگل کی زمین پر غیر قانونی طور پر تعمیر شدہ ڈھانچے کو ہٹانے و تجاوز شدہ جنگلاتی علاقوں کو دوبارہ حاصل کرنے کے مقصد سے کی گئی تھی۔

Conclusion

لہٰذا نیوز چیکر کی تحقیقات سے واضح ہوا کہ اتراکھنڈ میں بھارتی فوج کی جانب سے مسلمانوں کے مکان مسمار کئے جانے کا بتاکر شیئر کی گئی ویڈیو جموں کشمیر کے پونچھ میں فاریسٹ پروٹیکشن ٹیم کی طرف سے غیر قانونی تعمیرات پر کی گئی کاروائی کی ہے۔

Sources
Facebook post by Tariq Khan Journalist on 19 March 2025
Video uploaded by YouTube channels News9 Live, Poonch live and Rajouri News Channel on March 2025