اسرائیل میں مقیم بھارتی شہریوں کو بنکر سے نکالے جانے کی نہیں ہے یہ ویڈیو

اسرائیل میں مقیم بھارتی شہریوں کو بنکر سے نکالے جانے کا بتاکر سوشل میڈیا پر 41 سیکنڈ کی ایک ویڈیو شیئر کی جا رہی ہے۔ ویڈیو کے پہلے حصے میں خواتین آپس میں ایک دوسرے پر چیختی چلاتی ہوئی نظر آرہی ہیں اور دوسرے حصے میں بھی ایک شخص خواتین پر چیختا ہوا دکھائی دے رہا ہے۔ جس سے متعلق صارفین کا دعویٰ ہے کہ اسرائیل میں مقیم بھارتی شہریوں کو بنکر سے نکالا جا رہا ہے۔

ویڈیو کے ساتھ ایکس صارف نے کیپشن میں لکھا ہے “بھارت کی پوری دنیا میں رسوائی کی انتہا۔۔ اسرائیل میں مقیم بھارتی شہریوں کو بنکرز سے نکال دیا گیا۔۔ اسرائیل میں بھارتی شہری در بدر”۔

ایک فیس بک صارف نے بھی اسی ویڈیو کے ساتھ کیپشن میں لکھا ہے “‏پاکستان کے ہاتھوں ذلیل و خوار ہونے کے بعد بھارت کی پوری دنیا میں رسوائی کی انتہا۔ اسرائیل میں مقیم بھارتی شہریوں کو بنکرز سے نکال دیا گیا۔ اسرائیل میں بھارتی شہری ذلیل ہوتے ہوۓ”۔

آرکائیو لنک یہاں اور یہاں دیکھیں۔

Fact Check/Verification

اسرائیل میں مقیم بھارتی شہریوں کو بنکرز سے نکالے جانے کا بتاکر شیئر کی جا رہی ویڈیو کے پہلے حصے کے چند فریموں کو گوگل لینس کی مدد سے تلاش کیا۔ اس دوران ہمیں 26 اگست 2022 کو وائرل ویڈیو کے ساتھ شائع ہونے والی ایکنامکس ٹائمس کی ایک رپورٹ موصول ہوئی۔

ایکنامک ٹائمس کے عنوان کے مطابق ٹیکساس میں چار بھارتی نژاد امریکی خواتین کو نسلی زیادتی کا نشانہ بنایا گیا اور انہیں بھارت واپس جانے کو کہا گیا۔ رپورٹ میں یہ بھی واضح کیا گیا ہے کہ بھارتی نژاد امریکی خواتین پر حملہ کرنے و نسلی زیادتی کا نشانہ بنانے والی خاتون کو گرفتار بھی کرلیا گیا ہے۔ اس حوالے سے دیگر خبریں یہاں اور یہاں پڑھی جا سکتی ہیں۔

پھر ہم نے ویڈیو کے دوسرے حصے کے چند فریم کو گوگل ین ڈیکس کی مدد سے تلاش کیا۔ اس دوران ہمیں یہی ویڈیو فلسطین کے الجرمق نیوز نامی انسٹاگرام ہینڈل پر 11 مارچ 2025 کو شیئر شدہ موصول ہوئی۔ جس کے ساتھ فراہم کردہ معلومات کے مطابق یہ منظر یروشلم میں ایک اسرائیلی آباد کار کی جانب سے عیسائی خاتون کو ہراساں کئے جانے کا ہے۔ اس کے علاوہ اسرائیلی آباد کار نے خاتون کے چہرے پر پانی چھڑکتے ہوئے کہا تھا کہ یہ اسرائیل ہے، یہودیوں کا ہے، یہاں تمہارے لئے کوئی جگہ نہیں ہے۔

پھر ہم نے مذکورہ کیورڈ گوگل پرتلاش کیا۔ اس دوران ہمیں 12 مارچ 2025 کو شائع ہونے والی مڈل ایسٹ مانیٹر کی ایک رپورٹ موصول ہوئی۔ جس میں بھی واضح کیا گیا ہے کہ یہ واقعہ یروشلم کا ہے، جہاں اسرائیلی شخص کی جانب سے عیسائی خاتون کو ہراساں کیا گیا تھا۔

Conclusion

اس طرح نیوز چیکر کی تحقیقات سے یہ ثابت ہوا کہ یہ ویڈیو اسرائیل میں مقیم بھارتی شہریوں کو بنکرز سے نکالے جانے کی نہیں ہے بلکہ وائرل ویڈیو کے پہلے حصے میں ٹیکساس میں 58 سالہ ایسمرلڈا اپٹن نامی خاتون کی جانب سے چار بھارتی نژاد امریکی خواتین کو نسلی زیادتی کا نشانہ بنائے جانے کا ہے اور ویڈیو کا دوسرا حصہ یروشلم کا ہے۔ اس ویڈیو کا حالیہ ایران-اسرائیل تنازعہ سے کوئی تعلق نہیں ہے۔

Sources
Reports published by Economic Times, New York Post and NBC News on 26 Aug 2022
Instagram post by @aljarmaq_news on 11 March 2025
Report published by Middle East Monitor on 12 March 2025