जॉर्ज सोरोसच्या मुलाच्या लग्नात राहुल गांधीना दाखवणारा हा फोटो एआय निर्मित आहे

काँग्रेस नेते आणि लोकसभेतील विरोधी पक्षनेते राहुल गांधी यांचा एक फोटो सोशल मीडियावर मोठ्या प्रमाणात शेअर केला जात आहे, ज्यामध्ये ते अमेरिकन हेज फंड टायकून जॉर्ज सोरोस यांचे पुत्र अलेक्झांडर सोरोस आणि त्यांची जोडीदार हुमा आबेदीन यांच्या लग्नात अभिनंदन करताना दिसत आहेत. असा दावा केला जात आहे की राहुल गांधी यांनी जॉर्ज सोरोसच्या मुलाच्या लग्नात उपस्थिती लावली आणि नवविवाहित जोडप्याचे अभिनंदन केले.

या फोटोद्वारे, अनेक सोशल मीडिया युजर्स काँग्रेस नेत्यावर टीका करत आहेत आणि त्यांना देशद्रोही म्हणत आहेत.

खरं तर, भाजपने अनेकदा काँग्रेसला घेरण्यासाठी जॉर्ज सोरोस यांचे नाव वापरले आहे. देश अस्थिर करण्यासाठी राहुल गांधी ‘आंतरराष्ट्रीय शक्तींशी’ संगनमत करत असल्याचा आरोप यापूर्वी पक्षाने केला होता. भाजपने असाही दावा केला होता की सोनिया गांधी एफडीएल-एपी फाउंडेशनच्या सह-अध्यक्षा आहेत, ज्यांना जॉर्ज सोरोस फाउंडेशनकडून निधी मिळतो आणि ज्यांचे मत काश्मीर एक वेगळे अस्तित्व आहे. तथापि, काँग्रेसने हे आरोप फेटाळून लावले होते.

व्हायरल झालेल्या मेसेजसोबत, “अत्यंत निंदनीय, अत्यंत लज्जास्पद कृत्य. “काँग्रेसचे विरोधी पक्षनेते राहुल गांधी” भारताचे सर्वात मोठे शत्रू जॉर्ज सोरोस यांच्या मुलाच्या लग्नाला पोहोचले. शेवटी या लोकांना काय हवे आहे..” अशी कॅप्शन वाचायला मिळते.

हा फोटो अशाच दाव्यांसह इतर भाषांत वेगाने शेअर केला जात आहे. सोशल मीडिया पोस्टचे संग्रहण येथे, येथे आणि येथे पाहता येतील.

Fact Check/Verification

काँग्रेस नेते राहुल गांधी यांच्या व्हायरल झालेल्या फोटोच्या रिव्हर्स इमेज सर्चवर, आम्हाला हा फोटो असलेला कोणताही विश्वासार्ह रिपोर्ट सापडला नाही. आम्ही काँग्रेस नेत्याच्या अधिकृत सोशल मीडिया अकाउंटवरही शोध घेतला, पण तिथेही हा फोटो सापडला नाही.

याशिवाय, ऑनलाइन उपलब्ध असलेल्या अलेक्स सोरोसच्या लग्नाच्या फोटोंमध्ये आम्हाला राहुलचा फोटो कुठेही सापडला नाही.

जेव्हा या व्हायरल फोटोचे बारकाईने निरीक्षण केले तेव्हा त्यात अनेक विसंगती दिसून आल्या. उदाहरणार्थ, वधूचा हात असामान्यपणे वाकडा दिसतो आणि अलेक्स सोरोसची बोटे राहुल गांधींच्या कपड्यांवर आणि हातांवरून जाताना दिसतात. फोटोची अस्पष्ट पार्श्वभूमी आणि अत्यंत गुळगुळीत पोत देखील सूचित करते की हा फोटो एआय जनरेटेड आहे.

याशिवाय, व्हायरल फोटोच्या खालच्या उजव्या कोपऱ्यात एआय असिस्टंट ‘ग्रोक’ चा वॉटरमार्क देखील दिसतो, ज्यामुळे हे स्पष्ट होते की हा फोटो एआय जनरेटेड आहे. ग्रोकने तयार केलेल्या फोटोंमध्ये उजव्या कोपऱ्यात असाच वॉटरमार्क असतो.

यानंतर, आम्ही हे व्हायरल चित्र अनेक एआय डिटेक्शन टूल्सवर तपासले, ज्यावरून हे चित्र आर्टिफिशियल इंटेलिजेंसच्या मदतीने तयार केले गेले आहे याची पुष्टी झाली.

उदाहरणार्थ, हाईव्ह मॉडरेशनने नोंदवले की ही प्रतिमा एआय-जनरेटेड किंवा डीपफेक असण्याची शक्यता ९९.९% आहे, तर साइट इंजिनने ती एआय-जनरेटेड असल्याचे नोंदवले आणि ९९% संभाव्यता दर्शविली. त्याचप्रमाणे, इतर अनेक डिटेक्शन टूल्सनी देखील ही प्रतिमा एआय-जनरेटेड असल्याचे दर्शविले.

राहुल गांधी अलेक्झांडर सोरोसच्या लग्नाला उपस्थित होते की नाही याची आम्हाला स्वतंत्रपणे पुष्टी करता आली नाही, परंतु व्हायरल झालेला फोटो एआयच्या मदतीने तयार करण्यात आला आहे हे स्पष्ट आहे.

Conclusion

जॉर्ज सोरोस यांचा मुलगा अ‍लेक्स सोरोसच्या लग्नात राहुल गांधी शुभेच्छा देत असल्याचा दावा करणारा फोटो एआय निर्मित आहे.

Sources
Vogue
Hive Moderation Website
Singhtengine Website
WasItAI Website
Self Analysis

(हे आर्टिकल न्यूजचेकर हिंदीसाठी सलमान यांनी केले असून ते येथे वाचता येईल.)