மழையில் நடனமாடும் ஈரானிய பெண் என்று பரவும் வீடியோ தகவல் உண்மையா?

மழையில் நடனமாடும் ஈரானிய பெண் என்று வீடியோ ஒன்று சமூக வலைத்தளங்களில் பரவி வருகிறது.

”இந்த இரான் பெண்ணின் நடனம் ஆயிரம் விஷயங்களை சொல்கிறது. இனி இரானில் முல்லாக்களின் கொடூரமான ஆட்சி முடிவுக்கு வருகிறது என்ற மகிழ்ச்சியில் நடனம் ஆடும் பெண்” என்று இந்த வீடியோ பரவுகிறது.

X Link/Archived Link

சமூக ஊடகங்களில் பரவி வரும் இத்தகவலின் உண்மைத்தன்மைக் குறித்து அறிய நியூஸ்செக்கர் தமிழ் சார்பில் அதுக்குறித்து ஆய்வு செய்ய முடிவு செய்தோம்.

Also Read: கந்துவட்டி கொடுமையால் மரத்தில் கட்டப்பட்ட பெண் என்று பரவும் வீடியோ தமிழகத்தைச் சேர்ந்ததா?

Fact Check/Verification

மழையில் நடனமாடும் ஈரானிய பெண் என்று பரவும் வீடியோ குறித்த உண்மையறிய அதுபற்றிய ஆய்வில் ஈடுபட்டோம்.

வைரலாகும் வீடியோவைக் கீ-ப்ரேம்களாகப் பிரித்து ரிவர்ஸ் சர்ச் முறைக்கு உள்ளாக்கியப்போது கடந்த 2023ஆம் ஆண்டிலிருந்தே இந்த வீடியோ பரவி வருவதை நம்மால் காண முடிந்தது. தற்போது நடைபெற்று வருகின்ற ஈரான் – இஸ்ரேல் யுத்தத்திற்கும் இந்த வீடியோவிற்கும் எந்த தொடர்பும் இல்லை என்பது நமக்குத் தெளிவாகியது.

மேலும், நம் தேடலில் குறிப்பிட்ட வீடியோவில் மழையில் நடனமாடும் Tamta Sabelashvili என்கிற இளம்பெண், அவர் ஈரான் பெண் என்று வைரலாகியத் தொடர்ந்து தனது சமூக வலைத்தளப்பக்கத்தில் தான் ஒரு ஜார்ஜியா நாட்டைச் சேர்ந்த பெண் என்றும், ஈரான் யுத்தத்திற்கும் தனக்கும் எந்த தொடர்பும் இல்லை; குறிப்பிட்ட வீடியோ தவறாக பரப்பப்படுகிறது என்று தனது சமூக வலைத்தளப்பக்கத்தில் விளக்கமளித்துள்ளார்.

அவருடைய சமூக வலைத்தளப்பக்கத்தில் அவர் டிக்டாக் செயலியிலும் இருப்பதாக பதிவிட்டிருந்த நிலையில் இந்தியாவில் அதற்கு தடை இருப்பதால் நம்முடைய இலங்கை செய்தியாளர் உதவியுடன் Tamataவின் டிக் டாக் பக்கத்தில் இந்த வீடியோவைக் கண்டறிந்தோம். அதில், அவர் கடந்த 2023ஆம் ஆண்டே இந்த வீடியோவைப் பதிவிட்டிருப்பது நமக்கு உறுதியாகியது.

எனவே, இந்த வீடியோவே தற்போது ஈரானிய பெண்ணின் நடனம் என்பதாக தவறாக பரப்பப்படுகிறது என்பது நமக்கு உறுதியாகியது.

Also Read: திருவண்ணாமலை கோவிலில் அசைவம் உண்டதை நியாயப்படுத்தி பேசினாரா சேகர் பாபு?

Conclusion

மழையில் நடனமாடும் ஈரானிய பெண் என்று பரவும் வீடியோ தகவல் தவறானது என்பது நமக்குக் கிடைத்த ஆதாரங்களின் வாயிலாக தெளிவாகியுள்ளது.

ஆகவே வாசகர்கள் யாரும் இத்தகவலை நம்ப வேண்டாம் என்று நியூஸ்செக்கர் தமிழ் சார்பில் கேட்டுக் கொள்கின்றோம்.

Sources
Instagram Video from, tatasb_9, Dated June 19, 2025
Inputs from, Keerthika Mahalingam, NewsChecker Srilanka