کیا بہار میں جیت کے بعد اے آئی ایم آئی ایم پارٹی چھوڑنے والے رکن اسمبلی کے لئے ووٹ مانگنے آئے سرپنچ کو گاؤں والوں نے پیٹا؟ جانیں وائرل ویڈیو کی حقیقت

بہار اسمبلی انتخابات 2025 کو لے کر سیمانچل میں سرگرمیاں عروج پر ہیں۔ گزشتہ دنوں محمد اظہار اصفی کو کچھ لوگوں نے جیت کے بعد پارٹی بدلنے کے باعث مخالفت کا نشانہ بنایا تھا۔ اسی تناظر میں ایک اور ویڈیو اے آئی ایم آئی ایم پارٹی چھوڑنے والے ایم ایل اے سے منسوب کر کے شیئر کی جا رہی ہے۔ ویڈیو میں نظر آ رہے افراد پلاسٹک کی کرسیوں سے ایک دوسرے پر حملہ کرتے ہوئے نظر آ رہے ہیں۔

ویڈیو کے ساتھ ہندی زبان کے کیپشن میں لکھا ہے کہ “بہار میں اے آئی ایم آئی ایم کے ایک بھگوڑے رکن اسمبلی کے لئے سرپنچ جی ووٹ مانگنے آئے تھے، لوگوں نے ان کی پٹائی کر دی۔ لوگوں نے صاف صاف کہا- آگے اے آئی ایم آئی ایم سے گٹھبندھن نہیں، تو کوئی ووٹ نہیں”۔

اس ویڈیو کو مذکورہ دعوے کے ساتھ فیس بک پر بھی خوب شیئر کیا جا رہا ہے۔

آرکائیو لنک یہاں اور یہاں دیکھیں۔

Fact Check/ Verification 

بہار میں اے آئی ایم آئی ایم سے جیت کے بعد آر جے ڈی میں شامل ہوئے ایم ایل اے کے لئے ووٹ مانگنے آئے سرپنچ کی گاؤں والوں کی جانب سے کی گئی پٹائی کا بتاکر شیئر کی گئی ویڈیو کے چند فریم کو سب سے پہلے ہم نے گوگل لینس کی مدد سے تلاش کیا۔ اس دوران ہمیں یہی ویڈیو انڈیا ٹوڈے این ای کے یوٹیوب چینل پر ہوبہو ویڈیو ملی۔ جسے 4 اگست 2025 کو شائع کیا گیا تھا۔ جسے آسام کے ڈوبوکا میں ایک گرام پنچایت کی میٹنگ کے پر تشدد ہو جانے کا بتایا گیا ہے۔

مزید سرچ کے دوران ہمیں انڈیا ٹوڈے این ای کی ویب سائٹ پر بھی اس حوالے سے 4 اگست 2025 کو شائع شدہ ایک رپورٹ موصول ہوئی۔ اس رپورٹ میں بھی بتایا گیا ہے کہ یہ واقعہ آسام کے ڈوبوکا کے جمونا گاؤں میں پیش آیا تھا۔ جہاں مقامی انتظامیہ نے نو منتخب پنچایت نمائندوں کو مختلف فلاحی اسکیموں کے نفاذ پر تبادلہ خیال کرنے کے لئے خصوصی گرام سبھا منعقد کرنے کی ہدایت دی تھی۔ اس میٹنگ کے دوران منتخب شدہ نمائندے کے رشتے دار و مقامی باشندوں کے مابین جھگڑا ہو تھا، جس میں کئی افراد زخمی بھی ہوئے تھے۔ہے۔

مزید سرچ کے دوران ہمیں نیوز ڈیلی 24 نامی ایکس ہینڈل پر اسی وائرل ویڈیو کے ساتھ ایک پوسٹ ملا۔ جس میں آسامی زبان کے ساتھ کیپشن موجود تھا، جس کا ترجمہ تھا ڈوبوکا کے جمونا گاؤں پنچایت میں میٹنگ کے دوران پر تشدد جھڑپ ہو گئی۔ اس جھڑپ میں یعقوب علی نامی شخص کو کرسیوں سے پیٹا گیا۔

اس کے علاوہ ہمیں آسامی نیوز چینل ڈی اے نیوز پلس کے یوٹیوب چینل پر بھی اسی وائرل ویڈیو سے متعلق ایک ویڈیو رپورٹ ملی۔ یہاں بھی اس ویڈیو کو آسام کے ڈوبوکا کے جمونا گرام پنچایت کا بتایا گیا ہے۔

یہ بھی پڑھیں: مسلمان دکاندار پر ہندو انتہا پسندوں کے حملے کا بتاکر شیئر کی گئی ویڈیو میں نہیں ہے کوئی فرقہ وارانہ رنگ

Conclusion

لہٰذا نیوز چیکر کی تحقیقات سے واضح ہوتا ہے کہ بہار میں اے آئی ایم آئی ایم پارٹی چھوڑنے والے رکن اسمبلی کے لئے ووٹ مانگنے آئے سرپنچ کی گاؤں والوں کی جانب سے کی گئی پٹائی کا بتاکر شیئر کی گئی ویڈیو دراصل آسام میں ایک گرام پنچایت کی میٹینگ کے دوران دو گروپوں کے مابین ہوئی جھڑپ کی ہے۔

Our Sources
Video published by YouTube channel India Today NE on 04 Aug 2025
Report published by India Today NE on 04 Aug 2025
X post by News Daily 24 on 04 Aug 2025
Video published by YouTube channel DA News Plus on 04 Aug 2025