பஹல்காம் தாக்குதல்: தீவிரவாதிகளுக்கு ஆதரவாக செயல்பட்ட உள்ளூர் தலைவர்கள் கைது செய்யப்பட்டதாக பரவும் வீடியோ உண்மையானதா?

“காஷ்மீர் உள்ளூர் தலைவர்கள், துரோகிகள், பயங்கரவாதிகளுக்கு ஆதரவாக செயல் பட்டதால் பிடித்து கொண்டு செல்லப்படுகிறார்கள்” என்று குறிப்பிட்டு  வீடியோ ஒன்று சமூக ஊடகங்களில் பரவி வருகின்றது.

Post Link | Archive Link

Post Link

Post Link

சமூக ஊடகங்களில் பரவி வரும் இத்தகவலின் உண்மைத்தன்மைக் குறித்து அறிய நியூஸ்செக்கர் தமிழ் சார்பில் அதுக்குறித்து ஆய்வு செய்ய முடிவு செய்தோம்.

Also Read: பஹல்காம் தாக்குதலுக்கு பிறகு பாகிஸ்தான் மீது இந்திய ராணுவம் போர் தொடுத்ததாக பரவும் வீடியோ உண்மையானதா?

Fact Check/Verification

பஹல்காம் தாக்குதலில் தீவிரவாதிகளுக்கு ஆதரவாக செயல்பட்ட உள்ளூர் தலைவர்கள் கைது செய்யப்பட்டதாக வீடியோவில் ஜம்மு நியூஸ் லிங்க்ஸ் எனும் லோகோ இடம்பெற்றிருப்பதை காண முடிந்தது.

இதை அடிப்படையாக வைத்து தேடியதில் நவம்பர் 27, 2024 அன்று  ஜம்மு லிங்க்ஸ் நியூஸ் யூடியூப் பக்கத்தில் வைரலாகும் இதே வீடியோ பதிவிடப்பட்டிருப்பதை காண முடிந்தது.

ஜம்மு காஷ்மீரில் காத்ரா பகுதிக்கு அருகில் உள்ள வைஷ்ணவ தேவி கோவிலில் ரோப் கார் சேவை தொடங்க எதிர்ப்பு தெரிவித்து நடந்த போராட்டத்தில் இரண்டு தொழிலாளர்கள் சங்க தலைவர்கள் கைது செய்யப்பட்டதாக அதில் தெரிவிக்கப்பட்டிருந்தது.

தொடர்ந்து தேடுகையில் NH1 News, JK Update எனும் யூடியூப் பக்கங்களிலும் இதே தகவலுடன் புபேந்தர் சிங், சோஹன் சந்த் எனும் இரண்டு தொழிலாளர்கள் சங்க தலைவர்கள் கைது செய்யப்பட்டதாக செய்தி வெளியிடப்பட்டிருப்பதை காண முடிந்தது. இச்செய்திகளும் நவம்பர் 27, 2024 அன்றே வெளியிடப்பட்டிருந்தது.

இதனையடுத்து தேடுகையில் தி இந்து, டைஸ் ஆஃப் இந்தியா, பிசினஸ் ஸ்டேண்டர்ட் உள்ளிட்ட ஊடகங்களும் இச்சம்பவம் குறித்து செய்தி வெளியிட்டிருப்பதை காண முடிந்தது.

கிடைத்த ஆதாரங்களின்படி பார்க்கையில் வைரலாகும் வீடியோ 5 மாதங்களுக்கு முந்திய பழைய வீடியோ என்பதும், இவ்வீடியோவுக்கும் பஹல்காம் தாக்குதலுக்கும் தொடர்பில்லை என்பதும் உறுதியாகின்றது.

Also Read: காஷ்மீர் பஹல்கம் தாக்குதலில் கண் முன்னே தந்தையை இழந்த குழந்தை என்று பரவும் வீடியோ உண்மையா?

Conclusion

பஹல்காம் தாக்குதலில் தீவிரவாதிகளுக்கு ஆதரவாக செயல்பட்ட உள்ளூர் தலைவர்கள் கைது செய்யப்பட்டதாக பரவும் வீடியோ தவறானதாகும்.

ஜம்மு காஷ்மீரில் காத்ரா பகுதிக்கு அருகில் உள்ள வைஷ்ணவ தேவி கோவிலில் ரோப் கார் சேவை தொடங்க எதிர்ப்பு தெரிவித்து நடந்த போராட்டத்தில் இரண்டு தொழிலாளர்கள் சங்க தலைவர்கள் கைது செய்யப்பட்ட வீடியோவே இவ்வாறு தவறான தகவலுடன் பரப்பப்படுகின்றது.

இந்த உண்மையானது கிடைத்த ஆதாரங்களின் வாயிலாக தெளிவாகியுள்ளது. ஆகவே வாசகர்கள் யாரும் இத்தகவலை நம்ப வேண்டாம் என்று நியூஸ்செக்கர் தமிழ் சார்பில் கேட்டுக் கொள்கின்றோம்.

Sources
Report By Jammu News Links, Dated November 27, 2024
Report By NH1 News, Dated November 27, 2024
Report By JK Update, Dated November 27, 2024