Weekly Wrap: گلوبل صمود فلوٹیلا، پی ایم مودی کے حالیہ منی پور دورے و دیگر موضوع پر پانچ مختصر فیکٹ چیک یہاں پڑھیں

سوشل میڈیا پر اس ہفتے 44 ممالک کے بحری بیڑے کے غزہ کے لئے روانہ ہونے، بھارت کے 228 شہید فوجیوں کی تصاویر جاری کئے جانے، بھارتی پی ایم نریندر مودی کے حالیہ منی پور دورے و پولس کی جانب سے ڈوڈہ کے ایم ایل اے معراج ملک کو پرتشدد انداز میں گرفتار کئے جانے کا بتاکر شیئر کیا گیا، جن سے متعلق مختصر فیکٹ چیک درج ذیل میں پڑھیں۔

کیا غزہ کے لئے روانہ ہوئے 44 ممالک کے بحری بیڑے کی ہے یہ ویڈیو؟

سوشل میڈیا پر ایک ویڈیو کے ساتھ دعویٰ کیا گیا کہ یہ منظر 44 ممالک کے بحری بیڑوں کے غزہ کے لئے روانہ ہونے کا ہے، لیکن تحقیقات سے پتا چلا کہ یہ دعویٰ بے بنیاد ہے اور یہ ویڈیو چین کی ہے۔ پوری تحقیقات یہاں پڑھیں۔

کیا بھارت نے7-10 مئی کے واقعے میں شہید 228 فوجیوں کی تصاویر جاری کیں؟

سوشل میڈیا پر یہ دعویٰ کیا گیا کہ بھارت نے 228 فوجیوں کی تصاویر جاری کی ہیں جو مبینہ طور پر 7 سے 10 مئی کی پاک-بھارت تنازعہ کے دوران شہید ہوئے تھے، لیکن تحقیقات سے واضح ہوا کہ یہ دعویٰ جھوٹا ہے۔ دراصل وائرل کولاج میں شامل تصاویر مختلف سانحات جیسے پلوامہ حملہ، اروناچل پردیش حادثہ، سکم فلیش فلڈ اور دیگر مواقع پر شہید ہونے والے بھارتی فوجیوں کی ہیں۔ مکمل فیکٹ چیک یہاں پڑھیں۔

کیا مودی کے منی پور آنے پر چوراچندپور میں گھروں کو آگ لگائی گئی؟

آن لائن گردش کرنے والی ایک ویڈیو کے ساتھ یہ دعویٰ کیا گیا کہ یہ منی پور کے چوراچندپور ضلع کی ہے، جہاں پی ایم مودی کے حالیہ دورے کے موقع پر حالات کشیدہ ہوئے اور مشتعل ہجوم نے کئی گھروں کو نذرِ آتش کر دیا۔ لیکن ہماری تحقیقات سے معلوم ہوا کہ ویڈیو پرانی ہے۔ مکمل تحقیقات پڑھنے کےلئے یہاں کلک کریں۔

کیا وائرل ویڈیو معراج ملک کی گرفتاری کی ہے؟

سوشل میڈیا پر وائرل ایک ویڈیو کے سلسلے میں دعویٰ کیا گیا کہ اس میں ڈوڈہ کے ایم ایل اے معراج ملک کو پولس نے پرتشدد انداز میں گرفتار کیا ہے، لیکن تحقیق سے پتا چلا کہ یہ دعویٰ گمراہ کن ہے۔ دراصل ویڈیو دہلی کی ہے جہاں آوارہ کتوں کے حق میں احتجاج کرنے والے مظاہرین کو پولس نے حراست میں لیا تھا، اور اس کا معراج ملک یا ڈوڈہ واقعے سے کوئی تعلق نہیں ہے۔ پوری تحقیقات یہاں پڑھیں۔

کیا ذوالفقار علی بھٹو نے واقعی مذہبی جملہ کہا تھا؟

سوشل میڈیا پر وائرل ویڈیو میں پاکستان کے سابق وزیر اعظم و صدر ذوالفقار علی بھٹو کی ایک ویڈیو کے ساتھ یہ دعویٰ کیا گیا کہ انہوں نے امریکہ میں اپنے ایک بیان میں کہا تھا ’’چاہے 80 ہزار ہوں یا 80 ارب، محمدؐ کی بات آئے تو سب کو اپنے پیروں کی نوک پر رکھتا ہوں‘‘، لیکن یہ دعویٰ درست نہیں ہے۔ ویڈیو ترمیم شدہ ہے اور دراصل بھٹو کی 15 دسمبر 1971 کو اقوامِ متحدہ میں کی گئی تقریر کی ہے، جس میں ایسا کوئی جملہ موجود نہیں۔ پورا فیکٹ چیک یہاں پڑھیں۔